Diahuebs mainta na e rotonde di Paradera, e ekiponan di coremento 2fast4usports y Viper Strong a bini hunto pa asina yama ayo na coach Melvin Dabian kende hunto cu su famia lo ta biaha awe diahuebs pa Merca pa asina cuminsa un etapa nobo.
Den e cuadro aki tabata tin un momento hopi especial y sigur tambe emocional mirando cu e tabata ultimo entrenamento di coach Melvin como entrenador di 2Fast4Usports. Na banda di e despedida, coach Melvin a traspasa den forma simbolico e team di 2Fats4Usports pa un otro ekipo di coremento esta ViperStrong representa pa Kevin Regales y Jareth Vermeulen. Miembro di 2Fast4U Sports, Jairo Dijkhoff a hiba palabra y den nomber di e ekipo e la gradici coach Melvin pa tur e anjanan di dedicacion na e deporte di coremento, specialmente su ekipo 2fast4u sports. E coredor cu mas edad di e ekipo, sra. Edna Zievinger a dedica un bunita poesia na coach Melvin y a entrega un bunita regalo na coach Melvin como recuerdo. Por a nota aki cu hopi hende tabata cu awa na wowo, mirando cu coach Melvin tabata un persona hopi stima y keri serca su ekipo. Coach Melvin mes no por a bisa mucho e momento ey mirando su emocion y asina mes cu awa na wowo e la gradici su coredornan pa semper a apoya, sostene y kere den su persona.
Coach Melvin y 2Fast4Usports kier a manda un palabra di gradicimento grandi pa e Team di ViperStrong kendenan cu brasa habrí a tuma e coredornan cq atletanan di 2Fast4Usports. Coach Melvin tin pleno confiansa cu e ta laga su coredornan den bon man, cu nos propio coachnan jiu di tera manera Andy Gomes, Tristan Vermeulen y otronan.
Coach Melvin cu sentimento mixto y hopi emociona kier a duna danki grandi na tur cu a dune confiansa den tur e anjanan aki, cu a kere den dje te na final. E ta asina hopi pa mencioná : pero sigur na su Board di 2Fast4Usports, tur su atletanan/coredornan/ su team completo. Sigur nos lo bai sigui tende mas di nos Coach Melvin Dabian.
Nos di 297sports kier a gradici coach Melvin Dabian pa tur su anjanan di dedicacion y colaboracion duna na nos atletanan y deporte na Aruba. Coach Dabian tabata envolvi tambe den landamento y landamento artistico. Coach Melvin tabata un fiel colaborador di 297sports. di nos banda nos kier a desea Coach Melvin, su casa Zulema, su yiu Yeshua tur clase de exito na Merca.
