Siman pasa a tuma lugar e US PRO Cup na Fayetteville na e estado di Arkansas, aki nos coredo di mountain bike Loren Muffat-Meridol tambe a participa. Tabata tin careda di UCI XCO C1 riba diaranson y riba diasabra di UCI XCO HC, den tur dos careda tabata tin mehoracion den Loren su salidanan y e tabata keda den e pack durante start loop.
Apesar di e temperatura basta mas friu di loke Loren ta custumbra cu ne ta logra finalisa na di 23 lugar. Pa e careda di diasabra Loren tabata miho prepara y a baha 5 minuut di su tempo. Na e careda aki na Merca sigur sigur Loren a wak un mehoracion compara cu otro caredanan cu ela yega di participa den exterior, e ta considera esaki como un paso grandi pa por subi den ranking.
Mester remarca cu esaki ta Loren su prome aña den categoria U23 women, na unda cu e nivel ta mas duro cu ta haci cu e focus lo ta mas riba XCO, Cross-country Olympic, na lugar di XCC, Cross-country short track.
Pabien pa Loren cu a perservera y no a laga e clima friu strob’e di logra su meta.
