Un mucha homber di e bario Weg Sero Blanco. E di dos yui di Aura Kamperveen-Wernet y difunto Johannes Kamperveen. E comienso di Raymond den baseball tawata ora cu e cuminsa hunga Little League cu e equipo di Colgate bou maneho di Rubert Paesch. Despues di Little League e a hunga pa e equipo Coca Cola, bou maneho di difunto Edwald (Wally) Mohamed. E a sigui Hubenil cu e equipo Esso Centro di Bario Lago Heights. E a hunga te cu Juvenil ya cu e a bai studio na Hulanda despues cu e a caba su estudio na Aruba. Ora cu Raymond a bini bek di Hulanda despues di a caba su estudio, su persona a keda aserca, pa un amigo di dje di infancia, pa e por yude train un team di Senior League. Raymond a bisa si sin pensa dos biaha y a coach pa 2 aña den Senior. Na aña 2006 Raymond a haya e oportunidad pa representa Aruba como coach na e Campeonato Latino Americano di Senior League na Monterrey, Mexico. Cual tawata su prome experencia como coach representando Aruba Internacionalmente. E team cual Raymond tawata coach a keda disolvi despues di aña 2007.
E gana di laga e muchanan sera conoci cu un baseball alegre y mirando e influencia di baseball riba dje, cu a yude forma e persona cu e ta, tawata e ingredientenan perfecto pa dune e motivacion pa lanta un team di 5-6 pa su bario natal. Asina e realisacion di su soño aki a bin y White Sharks Baseball Organisation a keda funda na aña 2008 cu coach Raymond como President y Manager di e team 5-6. 15 aña despues nos por wak con White Sharks Baseball Organisation a crece bira grandi, y awor e ta consisti di teamnan di edadnan di 5-6 te cu e edad di Hubenil.
Den e transcurso di e 15 aña cu a pasa, semper coach Raymond a keda coach e team di mas chikito cu ta 5-6. Introduciendo e baseball alegra cu e fundamentals corecto na e chikitinnan, tawata e motibo principal cu nunca coach Raymond a subi pa un edad mas halto te cu aworaki. Si yudando semper den cualkier otro edad ora tin mester. Coach Raymond semper a enjoy siña e chikitinan, tin ora hasta di mernos cu 4 aña, e baseball alegre.
Nunca coach Raymond a traha pa un copa of medaya pero e satisfaciion di mas grandi pe ta ora cu e wak e muchanan progresa y enjoy e wega a lo maximo. Un paar di highlights di coach Raymond cu su team ta diferente titulo campeonil y sub-campion den diferente torneo aki na Aruba. Manager di seleccion di 5-6 representando Aruba.
Tur esaki sigur no tawata posibel sin e sosten di e weso di lomba di coach Raymond cu ta su casa acompaña pa su yuinan, Sin nan esaki nunca tawata posibel. Pabien coach Raymond. Nos ta deseabo hopi forza y sabiduria pa coach Raymond por continua cu e tremendo trabou cu coach Raymond ta bin ta desplegando pa cu nos chikitinnan.