1.1K
Awe diaranson tabata un dia grandi pa Brainer y Gerald di Beyond Sport Limit Foundation Aruba. For di man di CEO di MetaCorp, sr. Eddie de Veer nan a ricibi 3 ‘running wheelchair’ nobo nobo pa asina nan por core cu mas mucha muher y homber cu limitacion na Aruba. Mas cu claro esaki ta un bunita señal pa Aruba unda nos por alegra mas persona cu limitacion atrabes di deporte.
Den un speech cortico, sr. De Veer a bisa di ta masha contento di por aporta na Beyond Sport Limit Foundation ya cu nan causa ta uno excepcional. Esaki ta un bunita ehempel di duna otro un man pa asina e tambe por sinti kiko ta deporte y movecion. Tanto Gerald como Brainer a gradici sr. De Veer pa e bunita gesto aki y a priminti di haci bon uso di e running wheelchair nan aki. Na final Sr. de Veer mes a dicidi di pusha Brainer den e running wheelchair pa asina e sinti con e proceso aki ta den realidad, cual sin duda no ta nada facil, manera su persona mes a expresa.
Diadomingo awor durante e Metafit walk and run 2024, Beyond Sport Limit Foundation lo estrena tur 3 running wheelchair. Tanto Gerald, Brainer, Nigel, Amadee y Aldrin lo ta presente hunto cu e personanan cu limitacion. Tur 5 coredor lo bay e 21km.
Nos di 297sports kier a manda un palabra di pabien y danki na Beyond Sport Limit Foundation y MetaCorp.
