Awe nos kier pa henter Aruba conoce e atleta di atletismo, Asher Patel cu dentro di poco dia lo representa nos dushi isla di Aruba den e competencia di Carifta Track and Field Games na Trinidad & Tobago. Nos a haci Asher algun pregunta relaciona cu su persona y a bin discurbi cu Asher su ante-pasadonan a yega Aruba rond di 1920.
Esaki ta e storia di e hoben di atletismo cu ta considera su mes un Arubiano di alma, Asher Patel.
297sports: Ken ta Asher Patel?
AP: Asher Patel ta un ‘freshman’ na e Universidad di Cornell na Ithaca, New York y ta miembro di nan ekipo di Atletismo. Aunke Asher a lanta den e area di San Francisco, California, su curason ta bati riba e ritmo di Aruba—un lugar caminda su ante-pasadonan y famia a lanta cu lasonan profundo. Mi herencia ta un biahe remarkabel di resiliencia y reinvencion. Mi bisa-abuelo, Tolram Daryanani, a emigra for di India pa Aruba rond di e aña 1920, buscando un mihor bida den un pais nobo. Na 1928, Tolram Daryanani a lanta Palais Oriental den Main Street na San Nicolas — un negoshi cu awe ainda ta existi bou guia dimi su tanta grandi, Bharti Daryanani, casi 100 aña despues. Mi welo, John Daryanani, tabata parti di e prome imigrantenan di India cu a haya refugio na Aruba, scapando di un escape religioso na e parti nort di India. Mi wela, Anita Gomes, a nace y crece na San Nicolas y a experencia e Segunda Guerra Mundial cu Aruba tambe a pasa aden. Anita su tata, John Gomes, a traha na Lago Oil Refinery y Anita mes a keda corona como Reina di San Nicolas na aña 1966. Como cu ami mes tabata e prome miembro familiar cu a nace pafor di Aruba, asina mes e ta considera mi mes como un Arubiano —Americano di nacimento, pero cu un alma Arubiano. Durante e periodonan di verano, mi ta bishita regularmente unda e ta keda serca familarnan bibando na Aruba.
297sports: Con Asher a bira interesa den e deporte di atletsimo, bo a praktika otro deporte?
AP: Honestamente mi a cuminsa core na aña 2021 despues cu e pandemia tabata cabando, paso na California e otro deportenan tabata para pa motibo di e regalnan di Covid, pero e pista di atletismo si tabata habri paso nos por a keda riba un distancia. Aki mi a join pami keda den un bon condicion y aki mi a ripara cumi tin un talento natural y aki ta caminda cu mi a cuminsa entrena mas duro pa mira con bon realmente mi ta. Prome cu esey mi a hunga futbol, volleyball y basketball na scol, pero mino tabata dje bon ey te ora mi a discurbi cumi talento ta den atletismo.
297sports: Dicon bo a scohe pa representa Aruba den deporte na nivel internacional?
AP: Representa Aruba ta algo cu semper mi tabata kier pa motibo dimi coneccion cu e isla y e storia di henter mi famia. Kizas Aruba no tin un storia largo y exitoso den e deporte di atletismo, esaki a hacimi mas determina ainda y super motiva pa purba na pone nos isla riba e mapa di atletismo mundial. Mi tin mas famia na Aruba cumi tini na Merca. Mi ta sinti cumi por haci un impacto representando Aruba y ban spera cumi por inspira y motiva e generacion nobo di coredornan Arubiano pa pushanan mes pa bira exitoso
297sports: Kiko e ta significa pabo pa representa Aruba riba un plataforma grandi den deporte?
AP: E ta significa masha hopi mes pami representa Aruba pa motibo cu e ta e isloa dimi famia tambe. Ora mi a logra triunfa den e 3K na NACAC, mi ta corda cumi wela a yamami na yoramento y bisami con orguyoso e ta dimi. Un aña prome cu esey mi wela a sufri un derame y no por a cana mas. E tabata ta un inspiracion pa core pami wela y henter e isla di Aruba. Mi ta corda con orguyoso mi tabata ta despues di e careda aki y nan a toka e tono glorioso Aruba Dushi Tera pa prome biaha den historia di e competencia, paso nunca un Arubiano no a gana esaki. Mi a sinti cu no ta ami so a gana, pero e Triunfo aki tabata pa full mi famia y e isla di Aruba sigur den un posicion cumi tabata ta di no tabata e faborito pa gana e titulo maximo.
297sports: Cua tabata e les di bida mas valioso cubo a ricibi y cubo kier comparti cu e hobennan?
Tabata tin momentonan unda mi a encontra mi mes cu hopi obstaculo den coremento. Mi e lesion nami tendon den mi prome aña di coremento, mi a haya durante un tempo largo bronchitis y enfermedad cual a empedi cu pa lunas mi no por a presta den gran forma. E prome lesion tabata frustrante pero mi tabata sa cu e proceso di recuperacion tabata uno cu por duna miedo paso bo no sa si e lo ta completamente bon. Mi no tabata sa si mi lo por a core manera antes of cumi curpa tabata ta simplemente kibra. Dor cumi a keda kere den mi mes y keda consistente y ronda mi mes cu personanan positivo y cu a keda kere den mi y mi potencial ora mi a sintimi menos despues di un aña sin core, awo mi ta sintimi hopi bon y cla poa presta. Basicamente. Semper bo mester keda kere den bo mes, y esaki tambe mi a siña durante e NACAC. Representando Aruba, mino tabata tin compañero, y a wordo poni den un acomodacion hopi inferior compara cu e competidornan for di Canada, USA, y Jamaica. Nan tabata tin masseur, ice baths, hot tubs, hotel di 5 estreya, y por a sali come agradabel. Mirando tur esaki, mi a sintimi inferior y discurasha. Mi a sinti manera cu nan obligatoriamente mester gana e competencia mirando e bon trato y tur e bon recursonan na nan fabor. Pero den mi prome careda, mi tabata determina pa demostra tur hende lo contrario y esey mi a haci. Semper brasa e mentalidad di no ta faborito paso atletismo ta hopi mental y si bo ta fuerte, bop or competi cu oponentenan cu tin e mihor recurso cubo.
297sports: Kiko ta Asher su metanan pa futuro den deporte?
AP: Mi metanan den atletismo ta pa kibra e 4:00 den un miya of 3:43 den e 1500, y yuda mi team Cornell gana un Ivy League championship. Keda mehora e recordnan nacional Arubano, y representa Aruba super bon den competencianan di nivel regional, continental y mundial.
Te asina leu nos entrevista cu e atleta Asher Patel cu ta cla pa representa Aruba den e Carifta Games 2025 na Trinidad and Tobago.
