824
Dakota a hunga mas cu 80 minuut cu 10 hungador despues cu e bolante Camilo Peña ta keda expulsa. Di otro banda, Britannia a purba tur manera y casi tabata serca di anota gol pero portero Navarro di Dakota sin duda tabata e homber grandi den e anochi aki unda e la salba Dakota na varios ocasion.
Den e prome minuut nan di e wega, esaki tabata uno balansa unda ambos ekipo cauteloso a sali en buska di e atake. Sinembargo e carchi cora direct pa Camilo na di diez minuut a debilita henter e ekipo di Dakota, aunke mester bisa si cu e infraccion for di unda nos ta para no tabata mustra uno fuerte pa haya un cora direct. Aki mas cu claro Britannia a probecha y tabata tin e dominio di e wega cu un homber mas riba tereno. Esaki no a trece realmente un ventaha grandi mirando cu e linea di atake no por a penetra den e defensa di Dakota cu a keda hermiticamente sera y no duna mucho oportunidad pa sorpresa.
Dakota a defende disciplina y purba sorpresa cu e bala largo cu nan atacante Fernando de Sousa. Britannia su tironan di leu tabata e unico recurso peligroso pero aki e keeper di Dakota, Navarro a luci na tur momento. Tanto Susebeek (dos ocasion) y Melchor (tres ocasion) tabata hopi serca di anota e gol di bay ariba.
Dakota no a haya mucho chens durante e wega cu un bala bon tira pero esaki ta dal den e tubo di e gol. E wega ta keda 0 – 0 y aki den e tironan di penalti, Dakota tabata tin e rosea mas largo y ta gana Britannia 5 – 4. Jhonatan Ruiz ta e unico hungador cu no ta anota, su tiro ta pasa over di e gol.
Awor Dakota lo pasa pa e semi-final.
