Despues di a termina e parti online di e curso “Ciencias Aplicadas Al Deporte” cu a wordo otorga door di Comite Olimpico Arubano (COA) y Comite Olimpico Internacional (IOC) pa medio di e programa “Solidaridad Olimpica”, coach local srta. Milvienne Henriquez a yega Barcelona, Spaña, pa haci e parti presencial y asina conclui e curso exitosamente.
Awor Milvienne lo ta na Spaña pa algun siman pa termina e trayectoria aki. E obhetivo principal di e beca aki ta pa ofrece coachnan deportivo e posibilidad di por beneficia di algun curso di formacion di nivel halto. Di e forma aki nan por actualisa nan conocimento y alabes aumenta e experiencia profesional pa despues yuda comparti e conocimento aki y eleva e calidad di nan federacion y deporte en general na Aruba.
Como atleta Milvienne a forma parti di e seleccionnan nacional di futbol y softball di Aruba, un atleta multideportivo cu un tremendo habilidad y talento. Despues di a finalisa su carera como atleta, Milvienne Henriquez a keda activo den e mundo di deporte na Aruba unda e tin su papelnan di Concacaf B License cual ta e mas halto. Milvienne tabata coach nacional di e seleccion di Aruba Girls U14 cu a titula campeon invicto na 2021 den e torneo di CFU na Republica Dominicana. Actualmente Milvienne ta coach asistente di seleccion femenino mayor di Aruba y tambe coach asistente di RCA division di honor.
Comite Olimpico Arubano ta masha orguyoso di por a scoge Milvienne Henriquez como e persona cu lo sigui e curso aki. Milly semper ta dedica y tin un pasion grandi pa su deporte. Hopi exito cu e finalisacion di curso!!!
