Diadomingo mainta riba dia di Tata a tuma lugar e 5km Runway Run cu Wings of Hope di Aruba Airport Authority a organisa conmemorando e 100 anja di Aviacion na Aruba. Ya for di 4.30 di mainta e 100 coredornan cu a registra a cuminsa yega e parkeo pa asina prepara pa un careda historico. Tur participante a bisti nan vest ya cu esaki tabata un di e exigencianan. Por a sinti e adrenalina serca e coredornan ya cu pa tur e tabata un momento unico y historico. Tur hende a core relaha unda a disfruta di e momento oportuno aki.
Nos di 297sports tambe a forma parti di e mainta historico y nos tin cu bisa cu e tabata unico pa haci e trabou di fotografia riba pista di aeropuerto. E tabata algo unico ya cu e pista ta grandisimo, pues un emocion mirando cu nunca bo lo haya e oportunidad di subi un pista di aeropuerto sin mas. Cana riba e runway tabata algo spectacular. Mas cu 1 anja e comision organisador tabata haci e preparacionnan nesecario pa logra e dia aki bira un realidad. Hopi trabou y energia ya cu airport ta keda un lugar hopi vunerabel cu hopi regalanan estricto. E feedback di lo demas tabata positivo y Aruba Airport Authority lo evalua si nan lo por organisa e evento un biaha mas. Na final a reparti hopi premio mientras dos instancia a ricibi un donacion for di man di Wings of Hope.
Di aki banda nos di 297sports kier na felicita Wings of Hope, Triple A y tur esnan cu yuda den un evento unico y historico. Un danki special na Christina Leo y Gershwin Lacle pa e confiansa. E Dia di Tata esta 18 di juni 2023 lo drenta den e buki di historia di Aruba y nos ta contento di por a forma parti di esaki.
