600
Na vispera pa celebra e Dia Internacional di Hende Muher nos kier a recorda nos hende muhernan na Aruba den deporte
Na Aruba, e hende muher den deporte ta ocupa posicionnan clave den nos sociedad entre otro presidente den varios di nos federacionnan deportivo. Nos ta conta cu Nicole Hoevertsz den puesto di Vicepresidente di Comite Olimpico Internacional, Maureen Croes Vicepresidente di World Aquatics. Organisacionnan local di deporte manera COA y ASU tin hende muhe den puesto di Presidente, cu ta Wanda Broeksema y Soraida Boekhoudt respectivamente. Sin lubida coachnan cu ta dirigi team of seleccion na Aruba. Pa varios nos ta relata riba e tema aki y nos lo bolbe ripiti esaki. Nos atletanan femenino pa mas di dos decada caba ta sobresali y saca cara di Aruba den exterior. Nos atletanan femenino ta demostrando un nivel sobresaliente y ta surpasando tur expectativa den e deporte di nos region, continente y mundial.
Aruba a logra un medaya historico den e Weganan Panamericano na Santiago, Chile pa medio di nos atleta di sailing, Philipine van Aanholt cu a logra medaya di Plata pa Aruba. Nunca antes un atleta femenino di Aruba a logra conkista un medaya na e Panam Games. Durante e mesun weganan aki, bolichero Kamilah Dammers a logra un di 5 lugar overall. Na banda cu Kamilah ta un atleta di alto rendimento, ela wordo nombra como Hefe di Mision pa e Weganan Olimpico di Paris 2024. Esaki ta di dos biaha cu Kamilah lo eherce e funcion si Hefe di Mision. Su prome biaha tabata na 2017 na e Youth South American Games na Santiago, Chile.
No por laga afor nos Reina di Windsurf mundial, Sarah Quita Offringa cu den 2023 a bolbe gana dos titulo mundial, su di 22, cifranan cu hamas lo wordo kibra. Claro cu tin hopi mas atleta femenino cu logro impresionante manera e bolichero Kamilah Dammers (Oro), atleta di bike-cross Shanayah Howell (Brons), atleta di poomsee, Jenniffer Baez (Brons) y landadonan artistico y duo Mikayla Morales & Kyra Hoevertsz (septimo puesto den solo y 11 puesto den duet na e recuente Campeonato Mundial na Doha, Qatar, y durante e Weganan CAC 2023 a sa di gana 2 medaya di Plata y 4 Brons). E ekipo di landamento artistico, consistiendo di atletanan femenino, cu a sa di conquista dos medaya di brons na Weganan CAC 2023 tambe a sobresali. Nos mester reconoce nos futbolistanan femenino Girls U15 cu a keda na un di dos lugar den e torneo CFU na Republica Dominicana sin lubida e seleccion nacional femenino cu tambe a conoce un tremendo clasificacion den e Concacaf Women’s Gold Cup. Algun dia atras nos tabata tin Lana Gobert cu apesar di no a nace na Aruba a brasa e isla aki cu tur su curason y a sa na representa Aruba na su di 6 Abbott Major Marathon Event y logra un medaya conmemorativo cu tiki hende tini na mundo. Nos por menciona cu mas y mas hende muher ta envolvi den e mundo di coaching unda ta guia nos mas chikitonan den por ehempel mini futbol y coremento, un gesto sigur di aprecia y aplaudi. Mas cu claro esaki ta conta tambe pa nos dirigentenan den e diferente organisacionnan deportivo na Aruba trahando den forma boluntario na e bienestar di nos atletanan y deporte en general. Tog tin un area unda nos ta haya falta di dje y cu IOC ta poniendo hopi enfasis ta e hende muher den e mundo di periodismo deportivo. Na Aruba te ainda no tin un hende muher cu ta eherce e funcion aki.
No tin duda cu nos hende muhernan lo sigui presta den deporte, mientras como pais nos lo sigui duna nos maximo apoyo na cada un di nan.
Den nomber di Aruba completo nos kier a manda un palabra di pabien na tur hende muher cu ta activo den deporte riba e dia tan special aki, e Dia Internacional di Hende Muher.
PABIEN RIBA BOSO DIA
