461
Limitacion no tin un barera, tur cos porta posibel den bida, ta nos mester kier y kere den dje. Den e weekend tras di lomba, Beyond Sports Limit Foundation tabata na e isla di Boneiro unda participa na e careda di Guardian Loop 2024. Di algun tempo caba Beyond Sports Limit Foundation y e fundacion FKPD di Boneiro tabata den deliberacion pa asina Brainer Lampe y Gerald Moreta por participa cu dos persona cu limitacion na e evento di Guardian Group.
Finalmente e hobennan Dionne y Yadin ta esnan cu a keda eligi pa participa na e careda. Un dia prome cu e careda esta diasabra, Gerald y Brainer a pasa bishita e dos hobennan riba dos localidad separa pa asina sera conoci cu nan y nan famia. Tabata un momento masha bunita y sigur a ricibi un caluroso bon bini. E mayornan y nan famia tabata super contento cu nan yuinan por a haya e oportunidad aki pa participa hunto cu Beyond Sports Limit Foundation na e careda. Nan tabata hopi agradeci pa e oportunidad unico aki.
E diadomingo di careda, trempan e bus di e fundacion a baha e dos hobennan na e sitio di careda pa asina nan por prepara pa un momento cu tabata historico pa Boneiro. Nunca antes personanan cu limitacion no a participa na un careda unda nan a wordo pusha den un rolstoel special pa careda na pia. Mester bisa cu na inicio di e careda y na final tur e 500 participantenan a aplaudi e bunita gesto aki di Brainer y Gerald hunto Beyond Sports Limit Foundation. Hopi admiracion tabata tini pa Lampe y Moreta pa loke nan ta haci. Mester bisa aserca cu despues cu Gerald a yega na prome lugar overall di e careda y Brainer na di 5 lugar ta mas respet nan a haya for di esnan presente.
Na final a otorga na e dos hobennan Dionne y Yadin pechi y shirt cu firma di Gerald y Brainer como recuerdo di e bunita y momento inspirativo cu Beyond Sports Limit Foundation a pasa na Boneiro.
Nos di 297sports ta sinti nos mes honra di porta parti di e momento historico aki na nos isla ruman Boneiro. Un danki sigur na Brainer y Gerald y e team di Beyond Sports Limit Foundation pa e invitacion pero mas cu tur cos pa e confiansa deposita den mi persona pa por realisa e cobertura aki. Nos ta masha agradeci pa e oportunidad brinda. Tambe nos kier a gradici Richinell Domacasse y Shaedimir Jansen di Arubeast pa e ayudo brinda na nos.
Keda pendiente pa e entrevistanan cu nos di 297sports a realisa cu e mayornan di Dionne y Yadin como tambe Gerald y Brainer.
