E programa cu AVB a inicia aña pasa cune esta Talent Development Scheme(TDS) awe diadomingo a biaha pa Hulanda unda prome nos TDS U12 Boys lo bay hunga algun wega di fogeo contra teamnan profesional manera Feyenoord y Sparta ambos di e ciudad di Rotterdam. Esaki sin duda lo ta algo hopi grandi y unico pa nos muchanan, nan mayornan, staf di coaches, AVB y claro pa e futbol y deporte na Aruba.
Nunca antes nos hobennan no a logra biaha pa e otro banda di mundo pa hunga futbol. Esaki lo ta un bon test pa nan midi nan mes den nan habilidad futbolistico cua nivel y desaroyo ya cu na banda di clubnan profesional Feyenoord y Sparta nan lo topa tambe algun di Hulanda su top amateur clubnan, manera Rksv Spartaan’20, Vv Capelle, y Cvv Zwervers. No tin duda cu e lo yuda nos muchanan habri wowo y mira e deporte y bida for di un otro perspectiva cu solamente na Aruba, nan lo siña di e experiencia unico den bida cu ta spera cada uno.
Nos di 297sports kier a desea nos muchanan tur clase di exito na Hulanda. Haci bo mes y bo pais orguyoso