Awe dialuna nos por a tuma nota di un comunicado di Arubaanse Voetbal Bond, AVB relaciona cu un cancelacion di un invitacion pa Honduras cu e seleccion femenino U19. Esaki debi cu Colegio Arubano(den e caso aki) no lo permiti nan alumnonan realisa e viahe door di e siman di CP(Centraal Proefwerk).
Ta parece cu e siman di CP ta mescos cu e torneo y Colegio no lo hasi un excepcion pa e alumnonan aki. E razon ta cu e siman di CP ta crucial pa cada alumno si e ta pasa pa e siguiente klas den e proximo aña escolar si of no. Pues tur esaki no a duna AVB un otro opcion di cancela e viahe pa e torneo.
Nos tin cu bisa cu no ta prome biaha esaki ta pasa. Aña aden, aña afo e problema aki ta keda bini padilanti. Awo nos sa cu na Aruba no tin un acuerdo di deporte (sportregeling) entre directiva di scolnan y instancianan di deporte, e mayoria ta djis un cooperacion of acuerdo mutuo cu tini. Den pasado a scirbi riba esaki mirando cu awendia(mas cu den pasado) mescos e alumnonan ta dedica na su estudio e ta dedica na su deporte(tin biaha hasta mas) kizas cu un meta cu e lo kier logra pa su futuro. Nos tin entendi cu e seleccion femenino tin mas cu 6 luna ta preparando pa e torneo, dia aden dia afor pa e momento aki. Nenga nan e oportunidad unico aki tambe ‘por’ traha mentalmente den forma negativo riba e hoben cu kizas ta anhela pa por combina despues su deporte y scol na entre otro Merca. Den torneonan asina bo por haya hopi scout ta bin mira e talentonan aki. Cu propio wowo nos a experencia tur esaki den torneonan CFU na 2021 y Concacaf na 2022. Awo tur e soño a cay na awa y claro e demotivacion pa deporte y kizas hasta scol lo por bira menos.
Den nos humilde opinion mester por tin un forma di areglo pa e alumno tog por bay su viahe y alabez cumpli cu su scol. Den caso di un ekipo, un debido planificacion y trempan ta mas importante ainda. E ta imposibel pa kere cu tur e sistema moderno di tecnologia nos no por haya un solucion. E planificacion mester wordo hasi trempan entre scol y federacion, por ta na comienso di cada aña escolar(aunke no ta tur torneo ta defini). Awo den e caso aki no ta tur mucha ta bay Colegio Arubano kizas un tiki menos cu mitad seleccion pero awor henter e seleccion ta wordo perhudica. E sistema di Enseñansa na Aruba simplemente ta wanta e talento atras pesey tin hopi awor ta scohe pa un manera mas moderno den e caso aki Edu Campus.
Nos ta di opinion cu e yega e ora pa sinta na mesa y yega na un acuerdo cu directivanan di scol. Paso awor esnan perhudica ta alumno/atleta cu supose di ta centraal.
Corda cu esaki no ta un critica pero un observacion di parti di nos di 297sports riba e articulo di AVB relaciona cu e viahe posponi di e seleccion femenino U19 pa Honduras.
#297sports
Rector di Colegio Arubano, Tim Croes, MEd
“Dificil pa e alumnonan di scol perde 12 Centraal Proefwerk den un temporada importante asina”.
Nos a combersa cu Tim Croes, MEd kende ta rector di Colegio Arubano esaki relaciona cu e articulo cu nos a scirbi riba e seleccion femenino di Aruba cu no lo participa mas den un torneo na Honduras. Den un comunicado diamars emiti pa federacion di futbol, AVB ta poni nan lo cancela un biahe di seleccion femenino U19 pa Honduras debi cu varios alumno bishitando Colegio Arubano no por hasi e biahe aki pa motibo di perde henter un siman di CP-Week(Centraal Proefwerk).
Den nos combersacion cu rector Croes e la splica nos cu nan a sinta na mesa cu AVB y a splica nan e motibo pakiko e ta dificil pa duna permit e biaha aki na e alumnonan di scol. E siman di e torneo na Honduras ta cay igual cu e siman di CP na Colegio Arubano. Casi tur e alumnonan tin un total di 12 di CP e siman ey anto e ta bira dificil pa nan. Nan lo por traha esakinan den Her-CP pero e no lo ta factibel of ventahoso cu tur e CP nan aki y den tiki dia di tempo compara cu normal. Colegio semper a duna su cooperacion unda cu e por pero ta evalua tur situacion unda e alumno no ta keda perhudica despues cu su aña escolar.
A lo largo si e alumno scohe pa bay mes cu permiso di su mayornan y despues esaki resulta malo pa e mes, e consecuencia e lo mester carge na final. Claro cu ta pensa tur sorto di forma con pa bini na un posibel solucion pa cu esakinan, por ehempel duna e calendario di CP/SO adelanta na e federacionnan deportivo pa asina por planifica tur torneo na mihor forma posibel teniendo na cuenta cu tur alumno y nan scol. Colegio tambe ta haye fastioso cu e damitanan ta perde un bunita oportunidad asina pero tin prioridad y e no ta responsabel di Colegio su banda pa laga nan biaha. Na Aruba nos no conoce ainda un areglo deportivo pa atletanan di alto rendimento (topsport regeling) manera na Hulanda of Merca. Colegio mes masha poco sa nenga alumno pa oportunidadnan asina y semper si tin algo mes lo busca un solucion pa tog e alumno por hasi su biahe sin cu e ta keda perhudica. Claro cu Colegio lo purba pensa con mas nan lo por yuda den casonan asina aki.
Cu esaki rector Tim Croes ta spera di por a aclaria e motibo pakiko e tabata dificil e biaha aki pa laga e alumnonan bay den exterior.
Foto: cortesia 24ora.com