939
Mirando bek e luna di augustus di añanan 2021, 2022 y 2023, tur tabata e luna di exito di nos seleccion nacional femenino di futbol Girls U14 y U15. Riba dos di e potretnan e seleccion ta prakticamente mescos mientras e seleccion di e aña aki ta completamente nobo. Un hungador so ta aparece riba tur tres potret y esey ta Sharrienne Vrolijk. E staf tecnico si a varia cada aña.
Si nos mira bek e prestacion di tur tres seleccion ta simplemente impresionante.
E seleccion di 2021 cu a titula campeon den Tier 2, nan no a perde ningun wega, ni haya ningun gol encontra den e torneo CFU Challenge Series na Republica Dominicana, pues invicto. Es mas esaki tabata un di e prome biahanan cu Aruba ta hunga un torneo di futbol femenino den e edad ey.
Su siguiente aña 2022, e seleccion Girls U15 ta participa na e CONCACAF Girls U15 Championship na Tampa, Florida. E seleccion tabata prakticamente e mesun cu a competi na 2021 den e CFU na Santo Domingo. Na Tampa, nos seleccion Girls U15 ta yega te final eliminando un grandi esta Honduras pero ta cay cortico den e gran final contra di Nicaragua. Aki tambe Aruba ta perde 1 solo wega y ta gana tur e restante nan den Tier 2 mientras den un principio nos muchanan mester a hunga un nivel mas abou cu ta Tier 3. Pues hunga un nivel mas halto y den prome sali keda na di dos lugar.
E aña aki na 2023, un bes mas nos seleccion femenino a presta den forma sublime cu un seleccion completamente nobo den e CFU Challenge Series y atrobe nos ta yega te final invicto y sin gol encontra den Tier 1(nos a promove mirando e titulo na 2021) cual ta e mas halto den Caribe. Na final nos a keda cortico contra e poderoso Puerto Rico.
All by all nos mester ta hopi orguyoso mes di nos damitanan aki cu durante mas cu 3 aña largo a traha duro den un deporte di “mucha homber” unda nan ta sali eyfor y bin cu logro unico pa Aruba, 1 campeon y 2 sub-campeon. Mas cu claro esaki ta danki na tur e clubnan, entrenadornan, dirigentenan y mayornan cu e traha serca cu e muchanan aki pa asina tur esaki por tabata posibel. Cada uno a duna e mucha muher e oportunidad pa praktika e deporte cu e ta stima, den e caso aki futbol. No ta un trabou di awe pa majan pero un tempo largo di hopi sacrificio pa asina Aruba por ta riba e mapa di futbol di Caribe. Un pabien sigur na federacion di futbol, AVB kende cu nan vision nobo a percura pa e futbol femenino tin un balor mas agrega den e sistema di nos futbol, aunke mucho mas mester por wordo haci den futuro sercano.
Manera nos a scirbi anteriormente cu e grupo aki keda hunto, nos por premira cu dentro di algun aña e futuro di e seleccion lo ta uno super briyante mes. No lubida, Jamaica su seleccion femenino a hunga e Women’s World Cup pa di dos biaha. Pakiko nos no lo por? #believe
Un pabien na henter Aruba pa cu e logro aki. GRANDI NOS TA. Luna di augustus ta nos luna.
