451
Esaki ta e prome biaha cu e dos seleccionnan lo topa otro unda Corsow lo tin tur su futbolistanan profesional y Aruba tambe cu algun di nos futbolistanan semi-pro unda e mayoria ta biba y hunga futbol den exterior. Pa Aruba mas cu claro e lo bay ta un wega dificil pero mirando e prestacion di nos seleccion den e ultimo weganan hunga y sigur na cas, nos seleccion a hunga bala y cu resultado exitoso. Contra Corsow semper ta haci esaki extra special mirando cu nos tin e rivalidad di semper.
Bayendo un tiki den e historia entre e dos islanan nos a contact historiador Fico Vrolijk cu a conta nos lo siguiente.
Por bisa cu e prome wega internacional entre Aruba y Corsow no tabata data 6 di april 1924 na Aruba, e wega di 1924 tabata Vitesse di Aruba contra Sparta di Corsow cu a caba 0 – 4. E prome wega cu Aruba a hunga contra Corsow pa loke ta seleccion tabata dia 20 di april 1930 y aki Corsow a gana 2-1. Despues di a perde 7 wega sigui, Aruba a logra su prome empate (1-1) dia 1 di mei 1937. Dia 29 di juli 1944 Aruba, den e di 20 wega contra Corsow, a logra su prome victoria cu score di 4 – 2. E wega aki a tuma luga na Corsow. Dia 8 di december 1945 Aruba a logra su prome victoria na cas contra Corsow cu score di 2-1.
Aruba y Corsow a topa otro tambe pafo di Antiyas. Na augustus/september Aruba perde dos biaha contra Corsow, 2-2 y 5-1, den e torneo organisa pa N.A.V.B. na Surinam. Na augustus 1955 na Honduras den e campeonato di e Confederacion Centroamericana y del Caribe de Futbol Aruba a perde 2-1 contra Corsow. Un victoria cu hopi di nos grandinan tabata recorda ta esun cu Aruba a gana Corsow na januari 1953 cu score di 5-2 den e prome wega pa e “Mulina di Plata di J.E. Leoni”. Den total Aruba a hunga 103 wega contra Corsou y e tin 19 gana, 26 empata y 58 perdi.
Den e era nobo aki nos por a haya 4 wega so entre e dos islanan tur amistoso y e resultadonan nos por mira aki bou.
13 di juli 2012 Aruba ta gana Corsow 3 – 2
14 di nov 2013 Corsow ta gana Aruba 2 – 0
30 di jan 2015 Corsow ta empata cu Aruba 0 – 0
24 di nov Corsow ta empata cu Aruba 2 – 2
Majan diasabra lo bay ta candela unda pa 8or di anochi, e dos selecionnan lo topa otro un bes mas, e biaha aki den stadion Guillermo Prospero Trinidad na Dakota.
Nos ta sera e resumen aki cu un tremendo gol di un di e delanteronan mas peligroso den historia di Aruba su futbol esta Jonathan Lake(awendia DT di Sv Dakota) cu na 1994 ta anota un hoya di gol contra di Antias unda e ta avansa despues di a ricibi un pase na banda robez di tereno di defensor Yuyu Rasmijn y aki Jonathan cu su pia robez ta manda un misil diagonal cu ta bay pega den net. Manera Jonathan mes a discribi e gol; “Ta aki ta caminda tur cos a cuminsa”.
Wel majan ta Happy Island Boys all out, un caminda nos tin cu cuminsa.
LET’S GOOOOOOOOOOOO
