1.4K
Despues di e logra nan prome triunfo diasabra mainta riba e seleccion di Turks & Caicos, e seleccion Girls U14 di Aruba a hunga nan di dos partido unda e biaha aki e contrincante tabata Cayman Island.
Mester bisa cu awacero a yobe duro na comienso di e wega na Antigua cual a pone cu e tereno tabata uno muha y sigur nada facil pa hunga riba dje, e bala tabata slip y tabata move lihe y otro ora ta pega completo.
Asina mes Aruba ta sali bon y piki nan gol trempan den e wega pa medio di e delantero Zyana Rogers cu ta anota su di tres gol den e campeonato di CFU na Antigua. Segun e wega ta sigui su curso, Aruba tin e leve dominio riba Cayman Island. Nos damitanan ta purba na toke e bala apesar dine condicion di tereno dificil. E delantero Rogers tabata super padilanti unda cu cada bes e tabata tin e bala e defensa di Cayman Island tabata den problema. E prome gol a bini di Zyana Rogers su pia ora cu e ta usa su liherez explosivo y bay laga unda e ta tira bon pa e 1 – 0. Yegando casi halftime, Rogers ta bay laga henter e linea di defensa y aki e keeper ta sali pero e bala ta dal den su curpa y cay den pia di Sharrienne Vrolijk cu facilmente ta anota e di dos gol pa Aruba pa e 2 – 0.
Den e di dos tempo cosnan a sigui mescos ya cu a awacero a dificulta e wega di ambos seleccion. E cansancio a hunga un rol sigur ya cu e tereno pisa y e paña muha a pone cu e ritmo a haya por completo. Mucho no a pasa y e wega ta termina cu e victoria pa Aruba.
Aruba ta lidera e poule B cu dos wega gana. E seleccion di Aruba lo bolbe enfrenta Cayman Island diamars awor dia 22 mientras diaranson dia 23, Aruba lo hunga contra Turks & Caicos.
Ta bon pa remarka cu Aruba ta hunga den Tier 1 hunto cu 5 otro pais mirando e titulo di campeon di CFU logra na 2021. Aruba a pasa e tempo ey di Tier 2 pa Tier 1. Den Tier 2 tin 14 pais incluyendo nos islanan ruman Corsow y Boneiro.
ARUBA ARIBA