1.2K
E futbolistanan Vanessa Susanna y Bonnie Lammers tabata on fire diahuebs atardi den e wega di Aruba contra di Turks & Caicos. Ambos hungador a percura pa 7 gol anota, aunke nan por a score hopi mas. Aruba a domina henter e wega mientras cu portero Henriquez di Aruba mester a haci un salbacion so den e di dos tempo. Ya for di e prome minuut a mustra cu Aruba lo golea nan contrincante ya cu na di 4 minuut caba Vanessa Susanna ta anota e 1 – 0, tras di un bon paso di Yoya Tromp. Despues tabata Bonnie Lammers cu ta anota e di dos gol tras di un bon hugada individual. Den e tempo extra di e prome mitad, Vanessa Susanna ta anota e di tres gol pa Aruba pa medio di un penalti.
Den e di dos tempo, Aruba ta sali brabo y ya na di apenas 2 minuut, Lammers ta anota e 4 – 0. Aruba ta haya un penalti unda Susanna su penalti ta wordo para e biaha aki pa e portero di Turks and Caicos. Asina nos Aruba a keda ataka unda Lammers, Susanna y e debutante Stacey Lampe ta percura pa e produccion di 4 gol mas pa nos seleccion. Mester bisa cu e gol di Stacey Lampe cu a caba di drenta wega tabata un hoya di gol cu su pia drechi ‘buitenkant’ unda e bala a curvia pasa over di e cabes di e portero cu a sali riba e hugada. Un victoria grandi pa nos seleccion cu ta keda invicto na cas.
Henter e seleccion a hunga bon, e linea di defensa cu no a haya mucho trabou, e medio campo tabata stabiel cu Angela y Douglas mientras dilanti Lammers, Susanna, Kelly(Henao) y Doornkamp a percura pa atake constantemente riba e porteria di Turks and Caicos
Dialuna awor Aruba lo hunga contra di Belize cu ainda ta invicto despues di a gana Boneiro 5 – 1 diahuebs anochi na Kralendijk. Nos seleccion tin un ‘appeltje te schillen’ cu Belize.
Pabien Aruba, ban tur cu tin contra Belize.
