1.2K
Cu e victoria di 2 – 0 riba Cayman Island, Aruba su seleccion Girls U14 a sigura nan paso pa e siguiente buelta faltando un wega mas pa loke ta e torneo Caribbean Football Union Challenge Series den Tier 1. Aruba ta lidera e grupo B cu 9 punto y no por wordo yega mas pa Cayman Island y Turks and Caicos.
Den e wega contra Cayman Island, e hoofdrol tabata pa e bolante ofensivo, Loredana Neppi cu a demostra pakiko e ta peligroso cu ambos pia ora e tira riba gol. Den un lapso cortico, Loredana ta hinka dos gol riba dos tiro di distancia un cu pia robez y e otro cu su pia drechi pa haci e wega 2 – 0.
Den e di dos tempo, Aruba a sali y ataka bon pero nos no tabata tin e forza padilanti manera tabata e caso den e prome tempo cu Rogers y Vrolijk. Nos delanteronan tabata forza bon pero tabata falta e profundidad ya cu nos no a crea peliger dilanti di e gol di Cayman Island.
Pero manera nos a splica den e relatonan anterior tur mucha mester hunga mirando cu e ta un torneo di desaroyo y esaki ta e manera cu por midi cada hungador nan progreso como futbolista, un punto cu sigur nos ta aplaudi di CFU. Ta bon pa cada hungador explora un experiencia futbolistico na nivel internacional, esaki no ta pasa hopi biaha sigur no den e forma aki ya cu e ta costa hopi placa. Un bunita iniciativa di CFU pa yuda e futbol femenino den Caribe.
Mañan ta hunga nan ultimo wega den poule B contra di Turks & Caicos.
Pabien na nos muchanan. Mañan nos ta bay all out