1.8K
Nos seleccion Girls U14 a hunga e final awe diadomingo den Tier 1(esun mas halto) y a topa un Puerto Rico superior unda nos muchanan a keda cortico apesar di a bataya. E prome tempo nos por a wanta Puerto Rico bon pero den e di dos tempo, e cansancio serca nos damitanan tabata bisto. Y Puerto Rico a hisa e tempo di wega y tabata constantemente peligroso dilanti e gol di Aruba. A lo largo Puerto Rico ta gana cu e score final di 5 – 0
No obstante di e resultado final, nos muchanan a bataya nan mes te final, nan di tres den tres aña cual ta un prestacion di kita sombre. Aruba tabata den Tier 1, e nivel mas halto cu 5 otro pais mientras den Tier 2 por ehempel tabata tin 18 pais den Caribe. Pues cu otro palabra Aruba ta number dos den e region di Caribe pa loke ta futbol femenino su desaroyo infantil. Nos tin cu sigui traha riba e vision unda nos lo kier yega cu e futbol femenino den futuro.
Un cos ta sigur mirando e ultimo tres añanan di e seleccion femenino infantil/hubenil, nos tin hopi materiaal pa futuro. Cada experiencia mester sirbi como uno di siña y aplica, mihor so nos por bira.
Un pabien di curason na tur cu a traha cu nos muchanan henter aña.
