Feels good te be back!! Despues di 7 anja cu nos seleccion nacional di futbol mester a hunga sin nan publico, awe diasabra 14 di oktober esaki a cambia ora cu den un stadion Guillermo Prospero Trinidad na Dakota repleto di hende y riba un tereno full renoba, nos seleccion di Aruba a sa na derota US Virgen Island cu e score di 3 – 1. E wega tabata valido den Liga C di e CONCACAF Nations League. Aruba ta acomula 6 punto y ta na cabez di e grupo.
ASISTENCIA MASAL
E comunidad di Aruba a responde sublime na e wega aki apesar cu e orario di 3or di atardi unda e solo tabata candela. Ni esaki no a stroba e fanaticada apoya cu grito y aplaudi cada hugada di nos estreyanan. E seleccion di Aruba bou guia di entrenador Marvic Bermudez y su staf a hunga bon y a luci den gran forma durante e nobenta minuut di wega. Sin duda hunga un wega na cas(e mayoria pa prome biaha como seleccionado) tabata tin su efecto, cada esfeurzo extra tabata simplemente notable. Nos seleccion kier a duna nan maximo pa e comunidad di Aruba, specialemente e amantenan di futbol.
Pa loke ta e wega riba su mes mester bisa cu Aruba a domina gran parti di e wega, unda a lansa bon atake riba e porteria di Virgen Island. E linea di defense di nos bishitantenan tabata tin problema cu e presion buta pa e linea di atake di Aruba lidera pa e delantero Terence Groothuizen y aleronan Maria y Romano. Den e ultimo 10 minuut prome cu half e ritmo di wega ta baha completo, no tabata por otro mirando e solo cu tabata hopi cayente mes. Aruba a opta pa toka e bala y poco poco buscando e atake. Padilanti no tabata skerpi y agresivo mas manera na comienso di e wega. Di otro banda Virgen Island tambe a haya su oportunidadnan pa anota gol, pero serca nan tambe por a nota e cansancio. Sin duda un pluimpje pa nos linea di defensa y bolante cu a traha duro y a lucha cu alma y cuerpo riba tereno. Awe nos a simplemente luci cu nos wega calmo.
OPORTUNIDADNAN PA ARUBA
E prome bon chens pa Aruba tabata na di 6 minuut ora cu Groothuizen ta haya un oportunidad serca di e gol pero e portero a sali tapa mesora. Un rato despues Aruba ta haya e oportunidad di mas grandi pa medio di Jaybrien Romano cu ta haye su so cu keeper pero ta dal e bala den e portero y den e rebound Groothuizen tambe ta purba pero riba e linea di gol e defensa ta saca e bala. Aruba a sigui presiona buscando e gol di bay ariba. Den un tiro di skina, Groothuizen ta kop bon pero un bes mas e defensa ta saca e bala riba linea. Net prome cu half tabata Virgen Island cu a cobra un tiro liber cu portero Lentink di Aruba ta saca magistral.
GOL ARUBA
E prome gol a bini na di 51 minuut ora riba un cruse di Romano e bolante Rovien Ostiana ta anota e 1 – 0 cu un tremendo gol unda e ta bay halto y cu canti pia hinka e bala den gol. Ostiana ta hinka e prome gol di Aruba den e Guillermo Trinidad renoba despues di 7 anja di ausencia.
VICTORIA IMPORTANTE.
Aruba ta gana Us Virgen Island cu e score di 3 – 1 cu golnan anota pa Rovien Ostiana, Diederick Luidens y Mishawn Molina. Asina nos ta comanda.
