Awe diadomingo, Runners Unite a organisa un otro anochi informacion pa tur coredor cu ta bai core un Marathon. E biaha aki como invitado special e prome persona na Aruba cu a logra completa e Abbott World Marathon Majors, esta sr. Michel La Haye. Na aña 2014, Michel La Haye a logra core tur e 6-star Abbott World Marathon Major nan na mundo y tabata prome persona den Caribe cu a logra core tur e 6 marathonnan aki. La Haye a comparti su experencia largisimo den coremento di Marathon y a trece tur su medayan di tur e marathon nan bishita. Na banda di e 6 Major Marathon, La Haye a core tambe na Rotterdam, Miami, Baystate mientras na South Africa e la core un Ultra Marathon cu un haltura di 1800m. Pa Michael, e New York City Marathon tabata esun mas great. Na 2006 nan a forma CAPNY(coredornan Arubano pa New York) y asina tur cos a inicia. Mane Michel su conseho na esnan presente, importante di tin un running buddy, corda descansa, traha schedule, traha un plan y keda mantene y entrena manera debe ser sigur pa 4 luna largo.
Na banda di Michel La Haye presente tabata tey tambe Ana Mujica, Paulo Jordan, Lili Mejia cu a caba di core e Rotterdam Marathon 2023, Esther Colina cu a core Boston Marathon 2023, Vince Solognier cu a core London Marathon 2023 y Urvin Robert cu pronto lo core su prome marathon. Mas cu claro tur a comparti nan storia con nan a experiencia esaki. E idea di Runners Unite cu e sesionnan informativo aki ta pa coredornan comparti nan experiencia y duna tips na otro. Bo por ta coredor sea nobato of intermediate of experiencia, tur ta welcome. Corda cu solamente 1% di e populacion mundial ta capabel pa core un Marathon.
Nos di 297sports ta contento di por tabata presente awe na e charla inspirativo aki.
