Pa basta tempo nos tin e noticia aki wanta mirando cu nos a kere cu kizas lo por bin un solucion den un desicion cu a laga nos babuca. Aruba su unico referee di FIFA, Ricangel de Leca a tuma su retiro algun siman atras despues di a haye den un friccion cu e federacion di futbol, AVB.
Awo claro nos no ta bay profundo den e asunto pero parece un discusion entre referee De Leca y un dirigente di un club a bay para te na AVB y aki e federacion a atende referee De Leca riba esaki. E asunto no a cay den bon tera serca e referee cu a pone De Leca tuma e desicion drastico aki. Es mas, dia 3 di februari ultimo, pues 4 luna pasa De Leca y referee asisitente Jade Salamatin a haya nan badge di FIFA pa e temporada 2023/2024.
Na vispera di un playoff di futbol cu lo inicia e weekend aki esey sin duda ta di lamenta pa motibo cu e unico referee di FIFA cu Aruba tini no lo forma parti di e culminacion di un campeonato di futbol asina importante.
Nos a busca contacto cu referee Ricky de Leca pa un comentario unda e la bisa nos den un solo palabra: “Den bida ta yega un etapa cubo kier biba na paz”.
Nos a busca contacto cu head of referee Monique Ras pero nos no a logra haya su persona. Claro nos lo warda un reaccion di su banda tambe.
UPDATE: Den un combersacion sosteni cu head of referee, sra Monique Ras e la conta nos sin bay mucho den detaye cu berdad cu tin un incidente cu e socede cu referee Ricky de Leca pero cu awor referee De Leca a pida un tempo mas su mes pa e evalua y despues e lo mira si e lo sigui cu arbitrahe na Aruba. Te asina leu e declaracion cu sra. Momique Ras.
