936
E campeonato di Damas Open Class a continua riba tereno di Franklyn Bareño na Piedra Plat cu un total di tres wega programa. Nos di 297sports a bishita e prome wega cu a bay entre e amariyonan di Dakota y e tricolornan di Solito, RCA.
Nos a mira un prome tempo cu e ekipo di RCA dominando tocando e bala bon rond y via nan aleronan purba na yega e porteria di Dakota. Di otro banda Dakota a defende cu alma y cuerpo y via e bala largo busca na sorprende e defensa tricolor.
RCA ta ta habri e marcador trempan y ta anota un total di 4 gol den e prome tempo pa despues anota 4 mas den e di dos tempo pa hiba e victoria di 8 – 0. Golnan di RCA a keda anota pa Jennifer Amy Henao cu ta habri e marcador na di 7 minuut y ta anota un gol mas den e di dos tempo na di 59 minuut. Sinembargo e atardi aki sin duda tabata di Josrine Saladin cu ta scirbi un total di 5 gol ariba su nomber esakinan na di 16, 28, 44, 75 y 90 minuut. Tambe tabata tin un autogol di Dakota cu e bini di Lindsay Loopstok esaki na di 20 minuut di e prome tempo.
E wega di Damas Open Class ta 11 vs 11 y aki bo mester tin un elenco basta amplio ya cu e aspecto di condicion lo hunga un rol grandi segun e wega ta transcuri. E cansancio ta bira notabal serca mayoria di e hungador nan y si bo no tin un ekipo cu tur e cambio nan necesario e lo por bira dificil henter e campeonato. No mester lubida cu lesion, carchi, hungadornan ausente tambe por pasa y esaki lo por complica tur cos mas aun cada siman. Den pasado ya caba nos por a mira esaki serca varios ekipo y a lo largo e campeonato no a bay segun deseo. Kizas e ekiponan por sondia pa mas hungador femenino, entre otro na scolnan, etc. Futbol femenino ta creciendo y den bon desaroyo y esaki por nota desde 2021 y 2022 tras di e exito di nos seleccionnan femenino hubenil.
