Proyecto Leo Garcia a logra uni Casa Academy cu Aruba Talent Group

Aruba Talent Group su meta ta pa yuda tur futbolista di Aruba, yega na un nivel mas halto cu ta posibel na Europa. Locual ta  “Betaald Voetbalorganisaties” (BVO), club of un club di top amateur. Nos a start e temporada aki, cu un grupo di futbolista cu ta naci na aña 2005 te cu 2009. Actualmente e grupo ta consisti di 12 futbolista. Despues di a realisa un par di training, nos a logra scoge hungado cu por milita den un nivel mas halto cu locual nan ta na e momentonan aki. Un di e prome futbolistanan cu lo bay haci su prome tryout lo ta Elias Croes. Elias Croes su posicion ta portero.

 

E lo haci su prome tryout na Belga dia 4 di juni 2023. Dia 11 di juni 2023 lo ta su di 2 tryout, cual lo tuma luga na Alkmaar, esta na Hulanda mes. Cinco otro comapñero lo uni cu Elias, pa un tryout tambe na e delaster tryout menciona. Tin 2 tryout mas pendiente. Tambe nos lo ta seleccionando futbolista di Aruba Talent Group pa por join Casa Academy, kende lo participa den un torneo cu team di nivel basta halto na Portugal. Na Portugal e hungadonan lo enfrenta team manera Sevilla y hopi mas.

Idea di e proyecto aki ta pa yuda e fubolistanan, Arubiano, desaroya nan talento na un nivel mas halto posibel.

 

Nos ta convenci cu pa e temporada nobo, nos lo por tin nos futbolistanan Arubiano hungado den un nivel hopi mas halto cu nan ta aworaki. Asina nos ta trata na pusha nan, pa nan realisa nan soño di un dia yega mas leu den nan carera futbolistico y tambe como persona.

 

Nos di Aruba Talent Group y Casa Academy ta desea e muchanan tur clase di exito.