Peloteronan Shawn Bareño, Clayder Polanco, Charlson Croes y Nathon Cruz lo sigui nan estudio y deporte na Merca

E 4 hoben peloteronan di Aruba, Shawn Bareño, Clayder Polanco, Charlson Croes y Nathon Cruz a haya un oportunidad unico atrabez di Thrive Foundation Aruba pa sigui scol na Merca esaki den nan combinacion cu nan deporte esta baseball. Thrive Foundation a negosha pa e hobennan aki por a drenta e scolnan desea na Merca

 

Na Eagle Bowling Center, Thrive Foundation lidera pa ex-pelotero Randolph Oduber a firma e acuerdo cu e 4 hoben peloteronan den presencia di nan famia, amigo y conocirnan. Despues cu Randolph Oduber a elabora riba e trabou di Thrive Foundation, cada pelotero e introduci nan mes y e meta pa cual nan ta bay cune Merca. 

Segun Randolph Oduber pa 10 siman largo cada un di e peloteronan aki a pasa den un campo di entrenamento intensivo unda a prepara nan riba e parti fisico y tambe mental pa nan ta cla pa e etapa y bida nobo cu ta spera cada uno. Scolnan na Merca ta pone hopi enfasis riba e importancia caminda estudio y deporte ta bay hunto y cu tur dos mester ta cana den e bon direccion pa e atleta por continua. Thrive Foundation ta super contento cu un bes mas, nan por contribui cu e deseo di nos hoben y nan mayornan unda nan ta sigui scol y keda praktika nan deporte. 

 

Dos di e peloteronan esta Nathon Cruz y Shawn Bareño lo bishita Western Oklahoma State College mientras Clayder Polanco lo bishita Trinidad State College. Por ultimo nos tin Charlson Croes cu lo bishita Bay de Noc Community College y aki ex-pelotero Conrad Orman a yuda Thrive Foundation haya e scol pa Charlson. Na final di a anochi, e hobennan por a hunga bowling y have fun prome cu subi avion otro siman y aki dos siman.