Diaranson 11 di September 2024 den presencia di hungadornan, famia y fanatico a tuma lugar e bautismo di uniform nobo di e ekipo di Old Timers Baseball Clasico.
Durante un anochi ameno den establecimento di nan sponsor principal, Dream House Bar & Restaurant, e acto di bautismo a tuma lugar. Fundador y manager di Old Timers, sr. Patrick Werleman, a remarca cu e fundeshi di Old Timers ta hungadornan cu a hunga hunto den baseball AA mas cu 35 aña pasa. Pues a crea un amistad y hermandad hopi fuerte cu a conduci cu Old Timer ta considera su hungador y fanaticonan como un famia!
Sr. Werleman a expresa cu e y henter e organisacion Old Timers tin un aprecio sumamente grandi pa nan sponsornan Lucor Jewelers, Boolchands y Dream House Bar & Restaurant. Desde cu Old Timers a wordo funda na ana 2017 dicho sponsornan ta apoya y ta compromete cu e organisacion. Mientrastanto nan tambe a bira parti di e famia di Old Timers. Na su turno sra. Meiky Wu, propetaria di Dream House Bar & Restaurant tambe a expresa cu e ta compromete pa sigui yuda Old Timers y cu e ta hopi contento pa mira e amistad y hermandad cu semper a existi den e famia di Old Timers.
Pa e bautismo a uza dos uniform specifico esta e uniform nr 00 di Inti Wever, propetario di Brazil Dental Care cual tabata e prome sponsor di e ekipo, y tambe uniform nr. 99 cual ta pertenece na sr. Booshi Wever cual ta e miembro mas “hoben” di e organisacion. Pa efectua e acto di bautismo a duna honor na sra. Meiky Wu como e sponsor principal pa simbolicamente basha Champagne y su bon deseonan di amistad y hermandad riba uniform.
E bautismo a wordo clausura cu e lema di Old Timers, esta “Old Timers semper cu Respet, Alegria y Energia!”.