Nos legendario tabata e miembro di mas aña na bida di e organisacion di Marlboro. Paus Ruiz a cuminsa hunga baseball den decada di 50 cu e team di La Esfera hunto cu Boei Brion y Celin Swaen. La Esfera a bira Marlboro y Paus semper a stima e organisacion. Na 1975 despues di gana e segundo Copa Antiano a retira for di baseball y a keda semper un consehero pa e organisacion.
Paus a hunga diferente posicion y tur el a sabi di hunga nan facil y alabes un batiado di bon averahe. Na 1967 Paus y Jossito Muyale ambos di Marlboro tabata competi pa campeon bate. Paus a hunga cu hopi bon pelotero y contrincante. Richard Simon semper a bisa e miho shortstop cu el a wak den su bida ta Paus Ruiz. Segun Elias Kock e no a wak un pitcher cu un control asina perfecto manera Paus Ruiz. Na 1973, 1974 y 1975 Paus tabata grandi pa Marlboro ariba monticulo y a logra dos Copa Antiano 1974 y 1975.
Chu Halabi a conta cu Paus a drenta como relevo den un partido di Copa Antiano y e batiado a dal un home run. Paus a bira wak tur e peloteronan di Marlboro y e la bisa nan:”Awor mi tin e team di Corsou unda mi kier.” E resto a bira historia te gana e Copa Antiano.
Segun Teofilo Wester, e hugadanan na segunda base a haci cu Paus tabata unico. Paus tabata tira of ricibi e tironan den un forma unico. Paus a hunga cu Eric Ponson, Ro Agunbero, Victor Albus, Geo Guerrero, Yeyo Buckley, Ramon Buckley, Henry y Luty Burleson, Eddy Ras, Fan Fan Aparicio, Ronny Ridderstap, Ipy Kock, Jossito Muyale, Archi Williams, Elias Kock, Chu Halabi, Haligan Riley, Teofilo Wester, Alex Falconi, Claret Lopez, Mario Koolman, Juvenal Nava, Sito Ridderstap, Richard Simon, Karel Williams, Feky Caster, Nadeis y Ramon Reyes, Errol y Raul Werleman y hopi mas.
Semper e ta pendiente con e desaroyo di Marlboro ta bay. Un persona stima pa tur cu a hunga cu ne y contra di dje. Paus tabata yuda tur e hobennan cu a subi pa hunga cu Marlboro. Paus cu Marlboro a gana campeonato di Lago, ABBA y Copa Antiano.
Marlboro kier a extende su mas profundo condolencia na Ramona Ruiz y yiunan. Paus danki pa tur e tempo dedica na baseball di Aruba y sigur na bo organisacion di Marlboro cu bo a wak nace na 1959. Cu Paus sosega den Reino di Dios.