Nos organisacion ta di luto pa motibo cu nos ex-president Jozef Croes a bai sosega den Reino di Dios. Hopi forsa na e familiares di Jozef Croes specialmente na e mementonan aki. Na un edad relativamente hoben Jozef a forma parti di e bestuur di Marlboro bow di presidencia di sr. Boei Brion y despues mr. Andresito Bikker ambos den feliz memoria.
Jozef a bira e president nobo di Marlboro desde 1986 te cu 1999.
Un persona hopi stima den e mundo di baseball no solamente pa e hungadornan di Marlboro-Redmachine pero tambe di e otro organisacionnan. E trabow cu Jozef a hasi como president hunto cu su miembronan di directiva srs. Donny Kock, Efraim Bremer, Casildo v/d Biezen, Maiky Rasmijn, Jossy Lacle, Eddy Adonis, John Tromp, Mario Kransen,Otty Olivier y hopi mas tabata grandi.
Bow di su presidencia Marlboro a logra 11 anja straight campeon.
Jozef a traha serca cu e coaching staff di Marlboro Chu, Cai Cai, Richard, Archi, Vio, Casildo y a logra lo siguiente:
- Hiba Marlboro spring training cu Baltimore, Sarasota.
- Gana e Super Copa mas 2 Torneo na Curacao.
- Bai 2 biaha World Port Tournament na Rotterdam, Hulanda
- Bai Haarlemse Honkbal Week na Hulanda.
- A zorg pa e team a bai Global Championship Millington, TN. USA.
Jozef semper a stimula tur miembro di e organisacion pa duna lo maximo pa e club. Un persona respeta pa tur miembro di e organisacion. Su persona tabata bishita e trainingnan di hubenil, a-klas y AA y tabata duna tur e miembronan debido atencion.
Jozef su lema semper tabata: ‘’Nos exito ta resultado di train duro.’’
Semper Jozef cu nos miembro honorario Alex Mansur jr. ta tras di dugout ta apoya e team. Jozef y su bon amigo Elias Kock tur dia ta hunto y comparti cu otro. Marlboro-Red Machine lo haya bo falta Jozef Croes.
