1.6K
Diadomingo mainta dilanti un publico grandi, nos a presencia e gran final di futbol U13 entre La Fama y Nacional. Un final cu sin duda a inicia den gran forma unda Nacional ya den e prome minuut a haya un bon chens pa habri e marcador. Poco poco segun e wega ta avansa por a mira e dominio di La Fama principalmente padilanti cu Greaux De Souza y Carrasquilla creando hopi peliger dilanti di e gol di Nacional. Dado momento, La Fama ta bay ariba 1 – 0 cu gol anota pa Steven Greaux un rato despues ta bini e 2 – 0 pa medio di Adriano Nunez de Souza.
Den e di dos tempo, La Fama ta sali mesora e presiona buscando e gol trempan y asina seya e wega. Aki nan ta anota e 3 – 0 pa medio di Tyson Boasman. Sinembargo Nacional no ta entrega y ta anota e gol di corta ventaha pa medio di Juan Andres cu ta haci e wega 3 – 1. Di otro banda, La Fama a sigui hunga nan wega di toke y sigur hopi movibel padilanti cu
Jevin Carrasquilla, Cyler Arends y Jaydrick Panneflek kendenan ta anota e ultimo 3 golnan pa seya e titulo di campeon pa La Fama unda nan ta gana 6 – 1. Mas cu claro e publico gradisimo di Savaneta a celebra esaki engrande.
Na final AVB a haci entrega di e medayanan y copa na Nacional y La Fama.
Pabien na ambos organisacion
