Guardian Group Fatum ta participa na Ronde van Aruba
Como Gold sponsor y tambe cu team di estafette

Guardian Group Fatum ta contento di por sostene un biaha mas e
Ronde van Aruba y e aña aki como un di e gold sponsors. Ronde van Aruba ta un di e caredanan mas
grandi y popular na Aruba y ta wordo organisa tur aña door di Mariniers Kazerne Savaneta. E meta ta
pa core 72 km rond Aruba den 9 ora. Esaki por ta individual, como duo of den un team di 4 persona.
E di 31 edicion di Ronde van Aruba ta tuma luga riba diabierna 12 di mei y ta cuminsa pa
exactamente 8 or di anochi. E ruta di estafette ta parti den 8 trayecto di mas o menos di 9,2 km. E
cambionan di coredo lo tuma luga na Boca Grandi (8,2 km), Boca Prins (16,5 km), Ayo Rock
Formation (26 km), Alto Vista (33,6 km), Boca Catalina (42,8 km), Bushiri (52,7 km), Arugas na
Barcadera (62,2 km) y tin como finish Mariniers Kazerne Savaneta (72 km).
Guardian Group Fatum lo zorg pa un ambiente ameno na e di 6 punto di cambio na Bushiri pa asina
anima e participantenan cuminsando for di 12:30 AM. E punto di cambio di Bushiri lo sera 5:00 AM y
e finish lo sera pa 7:00 AM. Ademas di ta un di e sponsornan principal, Guardian Group Fatum lo
participa tambe na e estafette cu un team di 4 persona. E team ta consisti di Roberto Lejuez,
Roderich Streedel, Ilyana Maduro y team leader, Michelle de Groot cu ta Manager Commercial
Activities di e compania di seguro.
“Un bida saludabel ta hopi importante pa nos bienestar. E ta halsa calidad di bida en general y ta
forma e fundeshi di un comunidad feliz. Pa e motibo aki eventonan deportivo manera esaki cu ta
promove un bida saludabel ta importante pa Guardian Group Fatum”. Esaki di acuerdo cu Manager
Commercial Activities di e compania di seguro na Aruba, sra. Michelle de Groot.
Guardian Group Fatum ta invita comunidad completo pa apoya tur participante di Ronde van Aruba
dia 12 di mei. E publico presente tambe tin un rol importante y ta contribui na e motivacion,
prestacion di e participantenan y tambe na e ambiente y experiencia en general.
Pa mas informacion tocante Ronde van Aruba, bishita e pagina di Facebook: Ronde van Aruba – MSK