Un noticia sigur lamentabel nos a caba di lesa riba e pagina social cu nos coleganan di Futbol Aruba a tuma e desicion di no continua mas cu e proyecto aki. Esaki sigur ta un sla duro pa deporte, specialmente futbol. Conoci como un di e paginanan mas popular di deporte na Aruba, Futbol Aruba a dedica hopi tempo cu pasion cubriendo futbol manera a nan so por a haci esaki. Es mas ultimo añanan nan tabata super activo na nivel internacional cu cobertura di nos seleccion nacional di futbol masculino y femenino.
Mi persona como colaborador semper a traha bon cu nos coleganan di Futbol Aruba. Aña pasa nos como media hunto cu FA a duna un cobertura enconeccion cu e celebracion di e 90 aña di existencia di AVB. Tambe algun aña atras nos a haya e oportunidad di co-host e Ballon D’or cual tabata e proyecto di FA unda ta premia e mihor futbolistanan di temporada.
Di aki banda nos kier a bisa danki na Davyne Aldwyn Croes y Raymbert Bikker pa tur e añanan di dedicacion na e deporte di futbol, boso a buta e plataforma pa yuda e futbol na Aruba.
Hopi exito cu boso futuro proyectonan.