727
E rumannan Shondre y Ethan Quandt mester por zona pa esnan cu conoce nan tempo nan tabata biba na Aruba. Shondre tabata un futbolista y a forma parti den varios seleccion di Aruba. Di otro banda su ruman Ethan tabata un judoka y tambe a biaha varios biaha cu e seleccion di judo representando nos bandera den exterior.
Actualmente tur dos ruman ta studia na Hulanda y aki Shondre recientemente a logra gana e titulo maximo di un competencia di grappling/brazilian jiujitsu cu yama Let’s Roll na Utrecht, Hulanda. E competencia ta BJJ (Brazilian Jiujitsu) pero ora bo ta hacie sin e gi nan sa yame NO-GI of Grappling
“Mi ruman Ethan Quandt ta faha preto den judo anto e no a haya un bon team di judo den e area di Den Haag anto ela cuminsa bay Brazilian Jiujitsu pa mehora e ora ey su ground y un biaha e la invita mi pa bay entrena y ma guste. Mi tin awo 4 luna ta entrena Bjj. Mi a inscribi pa participa na e competencia Let’s Roll y eynan mi a sa na bay cu e prome puesto. E intencion di grappling ta pabo submit bo contricante cu un submission sea strangle of joint lock”, Shondre a conta nos.
Mester bisa cu na banda cu Shondre ta un tremendo atleta e ta tambe un studiante super ehemplar cu ta studiando Civil Engineering na e prestigioso universidad di TU Delft. E ta den su di dos aña di estudio den bachelor.
Na Aruba, Shondre tabata un futbolista cu a hunga den varios seleccion den futbol manera U13, U14 y U17. Na 2017, Shondre a anota e gol pa Aruba titula campeon den e torneo di Lifida 18 di Maart organisa pa e legendario y baluarte Jose Buchi Panama, awe den felis memoria. Shondre a cuminsa hunga futbol den Estudiantes pa despues pasa pa RCA unda e la hunga den Lif B – menor – major – junioren y debuta den Hoofdklas cu 14 aña unda e ta anota su prome gol contra Britannia den su debut.
Nos ta super contento y sigur orguyoso pa mira un deportista y seleccionado di Aruba briya den deporte y sigur tambe den su estudia na Hulanda. Nos mester lubida cu unda nan bay ta nos bandera nan ta representa.
Pabien y hopi exito Shondre.
