1K
E Curacao Baseball Week ta un exito rotundo mirando e acohida y atencion grandi cu esaki a haya no solamente na Corsow pero tambe den exterior. E popularidad di e Curacao baseball week a crece enorme y mas cu claro esaki no por otro ya cu mayoria di e big leaguernan di Corsow manera Albies, Gregorius, Balentien, rumannan Profar, Jansen, Meulens y Simmons pa anjas ta participa na esaki y asina contribui cu e siman di baseball di nan isla natal pero principalmente na tur cu ta envolvi den e deporte di baseball esaki di pelotero, coach, manager, umpire y dirigentenan. Es mas nos propio big leaguernan di Aruba manera Kingsale, Maduro y Bogaerts ta wordo invita pa participa na esaki mientras nos hoben peloteronan di Aruba ta biaha pa Corsow pa asina atende e Curacao Baseball Week.
Nos a combersa cu ex-big leaguer, Eugene Kingsale cu awendia ta residencia na Republica Dominicana, riba un posibilidad si Aruba un dia por organisa nan propio baseball week. Eugene a conta nos cu e ta sumamente contento di por a haya e oportunidad aki pa participa na e Baseball Week na Corsow, p’e un di e mihornan cu ela experiencia.
“Tur cos ta posibel si e disponibilidad di tur hende cu ta willing pa haci esaki tey. E baseball week aki mester ta uno tras di otro pa e islanan, pues e siman aki na Corsow, despues Aruba sigui pa Boneiro, por haci uso di e mesun peloteronan di e islanan y e guest star invita manera den e caso aki legendario Dusty Baker jr. Mester prome traha un comision consisti di hendenan serio, cu ta dispuesto pa yuda y cu por bay e ‘extra mile’, pa realisa e siman di baseball. Bo mester tin hopi pasenshi y percura pa bo haya hende bo tras cu ta kere den e Proyecto unda bo ta recuada fondo pa cubri e gastonan mas principal cual ta e pasashi, estadia, cuminda y transportacion. Na Corsow por ehempel bo ta mira e patrosinadornan tur ta sobresali ya cu e cobertura ta grandi tanto local como internacional y riba tur plataforma di media. Y claro trece un of dos guest star manera den e caso aki e legedario Dusty Baker jr esaki ta causa un impacto grandi ya cu ta trata di un HOF manager cu ta un di e mas grandinan den e era di Major League Baseball. Anto asina bo ta haya cu e patrosinador nan ta bolbe tur anja bek y otronan ta bini aserca. E impacto y efecto cu e baseball week cu tur su estreyanan tin riba no solamente e hobennan, pero tambe riba e coachnan, mayornan, dirigentenan y umpirenan ta yuda e baseball bay padilanti. Cada conseho, tips, remarke valioso cu ta bin for di e profesionalnan di MLB pa mehoracion ta wordo tuma na serio y esey ta haci e proyecto aki grandi. Wak con Corsow ta presta den baseball den e ultimo anjanan”, Eugene a bisa nos.
Kingsale ta sigui conta cu nos por conta na Aruba cu nos propio peloteronan pa yuda den e clinica, invita algun pelotero di Corsow y claro trata na haci uso di e mesun ‘guest star’ nan na tur tres e islanan cual ta mucho mas facil. Pero atrobe nos por sinta hunto cu Corsow y Boneiro y planifica un calendario cu ta realistico y realisabel pa tur tres e islanan. Eugene ta convenci cu Aruba tin hendenan capacita cu por traha riba esaki y cu por logra realisa e Aruba Baseball Week. Una bez bo realisa esaki pa prome biaha, e draaiboek ey ta facil pa mantene cada anja. Ta djis bo tin cu evalua con pa mehora y ehecuta esakinan. Asina bo partnernan lo kere den bo y cada anja nan lo ta dispuesto pa yuda atrobe, tur na bienstar di e deporte di baseball. Claro cu esaki lo bay tin tambe efecto positivo riba tur hende cu ta envolvi directamente of indirectamente cu e deporte di baseball.
Te asina leu nos combersacion cu Sir. Eugene Kingsale.
