Na vispera di e temporada nobo di coremento y canamento nos kier a comparti un articulo di RUNNERS WORLD cu e topico Superficie recomenda y no recomenda pa entrena y/of core riba dje.
Cierto tipo di superficie ta miho cu e otro pa entrenamento y e coremento mes.
Cana riba asfalt y caminda cu pavers no necesariamente ta un riesgo mayo pa sufri lesion. Cu un keds adecua bo por uza cualkier superficie, sea riba caya of den mondi. Akibou ta sigui un compilacion di e miho superficienan riba un rij.
Grindpad (recomenda)
No mucho conoci na Aruba. Debi na e piedranan chikito e tipo di ruta aki ta duna bo e sensacion di “cusinchi”, esaki ta e superficie prefer di hopi coredo.
2. Ruta den mondi /naturales (recomenda)
Si bo tin mondi rond, definitivamente bo mester inclui entrenamento semanal den e area aki. E superficie ireguar y desbalansa ta yuda perfecciona coordinacion ya cu mester tene mas cuenta unda por stap. Tene cuidou pa bo no troce bo enkel den e area aki.
3. Yerba of moss (recomenda)
Si bo tin hopi yerba cerca, bo mester probecha pa cana de bez en cuando riba esaki. Esaki ta specialmente maraviyoso despues di un careda largo. E coredonan cu ta sufri di dolor di e plant’i pia) mester evita core riba yerba. Riba superficie moli e chens ta mas grandi cu e coredo por sufri un “lesion”na enkel.
4. Asfalt (recomenda pa coredo cu mas experiencia)
Esaki ta probablemente e ruta mas uza pa core. E asunto aki ta impone mas exigencia na e joints, caminda e coredonan tin mas chens di haya “lesion”. Mester tene hopi cautela cu e asphalt y scoge bon keds. (Excepcion si ta pa coredonan cu ta sufri di “Aquiles Tendinitis”, cu ta e uzo extremo di e grupo di spier cu ta conecta e weefsel na e parti patras di e pia, esta di e batata di pia pa e enkel. Ta cumbini e coredonan aki pa core riba asfalt, paso asina e weefsels ta rek menos.) Si ta bay train pa un maraton, e ora ta consehabel haci esaki riba asphalt ya cu esaki mayoria biaha ta sosode riba caminda di asfalt.
NOTA: No lubida cu na Aruba, e caminda di asfalt na ambos banda ta baha, esaki pa e fluho di awa por bay den e drainage. Pues e caminda no ta mucho stret.
5. Santo (tene cuidou)
Un superficie cu ta yama atencion ya cu e ta corda bo riba bunita beach, vakantie y relahacion, pero e ta un superficie dificil pa coredo debi na su instabilidad. E ta rekeri un esfuerzo inusual di musculo cu ta aumenta e riesgo di lesion. Mantene recorido cortico ora ta train na beach y evita nan completamente si ta sufri sprains di enkel of Aquiles Tendinitis. Si ta posibel, busca e santo di mas duro.
6. Pista di atletismo (recomenda)
E pista aki ta recomenda danki na e pista di atletismo su largura manehabel, stabilidad agradabel y un superficie excelente pa e training di interval y di velocidad. Bo por opta pa un careda di resistencia y recuperacion of pa un rato di relaha cu musica den bo cabes unda bo ta keda ripiti e mes accion den e mes direccion cual ta desaroya e “sindrome di e banda ilitiobal (IBTS).” E sindrome aki ta e di dos lesion di rudia mas comun, causa door di inflamacion. E sindrome aki ta asocia mas tanto cu coremente riba distancia leu, core bais, weightlifting y training militar.
Tambe tin superficie cu no ta mucho recomenda pa e expertonan.
7. Core riba Beton of Concrete(No recomenda)
Core riba beton ta peligroso, e shok nan cu bo ta sinti den e pia, rudia, heup y parti abou di bo lomba ta uno fuerte. E por tin efecto riba bo wesonan,bo tendon y jointsnan. Esaki por tin consecuencia y riesgo pa haya lesion pisa na e partinan di curpa menciona.
8. Core riba Pavement – Pavers(No recomenda)
Pavers/Pavement mescos cu Beton/concrete ta un superficie mucho duro pa core riba dje y por trece e tipo di lesionnan cu ta wordo menciona na punto 7. Na banda di esaki, si e pavers no ta bon poni(los y habri mei mei), e por causa lesion nan grave. Un di nan ta e riesgo di bira bo enkel of trompica debi cu e pavers por ta lanta door di e raiz di e matanan den cercania.
Menos lesion cu e uzo di un superficie apropia?
Kico ta e influencia di e superficie pa haya lesion?
Bo por evita menos lesion door di scoge e tipo di superficie apropia?
E efecto na momento cu bo pia trapa riba e superficie ta crea un peso riba bo curpa. Investigacion a demostra cu den comparacion cu yerba, e peso di mas pisa ta riba asfalt. E punto di mas halto riba e asfalt ta di mas o menos un 13% mas halto compara cu ora di core riba yerba. Ademas e peso na momento di trapa riba un superficie di yerba, ta parti riba un espacio mas grandi compara cu e asfalt. Parti positivo cu e asfalt ta duro ta cu na momento cu bo mishi cu e asfalt, esaki mes ta yuda bo door di bons bek mas facil y lihe. Esaki ta sali bo di bon den bo tempo, pero na mes momento e ta un peso negativo riba bo curpa.
Mientras riba un superficie suave e peso ta dos biaha e peso di bo curpa, na un superficie duro esaki ta cinco biaha mas. E ripiticion constante di e peso rib abo batata di pia ta haci bo mas vulnerabel na lesion y factura.
Coremento “Groucho”
Un manera pa minimalisa e impacto di e peso di trapa riba un superficie duro ta pa sak den bo rudia ora di trapa riba e superficie aki. E supuesto coremento di “Groucho” ta ser caraceterisa door di un sorto di estilo di cana lihe unda e grado di huki entre bo rudia y heup ta bira menos di loke nos ta custuma. Bo por ripara esaki door di pone mas atencion na bo dij (parti interior di bo bil).
Esakinan ta bira mas horizontal cual ta minimalisa e parti stijf di e pia cu mas o menos 20% y ta zorg pa un contacto mas stabil y largo di e pia cu e superficie bahando e shock di e peso cu 80% menos na momento di trapa. Pues menos chens pa lesion. Loke si ta sufri danki na esaki ta bo tempo.
Lesion riba yerba?
Lesando e informacion anterior lo bo por conclui cu bo tin mas chens pa haya lesion haciendo uzo di superficie duro, pero esaki toch no ta completamente berdad. Yerba tambe tin su parti negativo, cual ta e dificultad pa mira piedra, buraco y material instabiel riba e superficie. Pa e motibo aki mester keda ahusta pia, rudia, heup y enkel constantemente y no ta tur coredo por haci esaki facilmente. Un investigacion a demostra cu pa e motibo aki hustamente hopi coredo ta haya lesion uzando e tipo di superficie aki.