Entrevista cu softbolista Sayenne Geerman cu actualmente ta hungando pa Nuoro Sardegna Softball na Italia

Algun siman atras despues di a hunga e clasificacion cu Aruba su seleccion di softball femenino na St John, e softbolista Sayenne Geerman a haya e grato noticia cu e lo por uni cu un ekipo na Italia pa un tryout di 4 luna. E ekipo di Nouro Softball ta milita den e Division Serie A2 fastpitch y aki Sayenne ta hunga tercera base. Algun dia pasa Sayenne a haci su debut pa e ekipo di Nuoro.

Pa nos di Trempan un bon momento pa entrevista e prome softbolista femenino di Aruba(segun nos) cu ta milita den un ekipo na Italia.

Trempan: Con ta bayendo na Italia?

SG: Aki bou den e ekipo ta bayendo hopi bon mes. Mi a jega Sardegna Italia dia 28 di maart. Mi ta hunga pa e ekipo di Nuoro aki na Sardegna, Italia. Nos ekipo ta consisti di hungadornan for di Italia, pero tambe nos tin hungadornan di Spaña y Bulgaria y ami mes cu ta e unico di islanan Caribe como Rubiano. Tur nos coachnan ta Cubano cual 1 di nan ainda ta hunga softball profesional pa nan mesun pais.

Trempan: Conta cu e nivel di softball na Italia?

SG: Actualmente nos team ta hungando den e series A2 y purbando pa keda den A2 pero como meta pa subi den e nivel mas halto cual ta A1. Aña pasa, Nuoro tabata den A1 pero a baha pa A2 door cu tabata falta hungadornan pa duna forsa na e ekipo. Mi ta splica esaki un poco mas door cu Nuoro ta un parti cu ainda Softball no ta esun di mas hunga akinan, y ta depende hopi di hungadornan di afo. No tin mesun hopi hungadornan di softball compara cu otro parti nan di Italia manera cu tin por ehempel na Milan y Torino etc.

Un cos si mi tin cu bisa ta cu Italia en general ta duna hopi oportunidad na hungando nan di afo pa juda duna forsa na ekiponan.

Trempan: Conta nos con s bay cubo prome wega cu Nuoro na Italia?

SG: Diadomingo cu a pasa aki nos tabatin dos wega na Milan. Nos tin wega nan na cas mes y nos tin wega nan unda nos tin cu biaha bay diferente parti bay hunga.

Tabata dos wega cu nos a bataya duro pero lamentablemente nos a perde nan.Nos a bataya duro pero no a logra gana.

E weekend aki nos tin dos wega na cas mes. Nos ta train tur dia, tin biaha dos biaha pa dia. Mirando cu tin hungadornan cu a jega for di afo laat y te awo nos por ta ful completo y cuminsa train mas duro como ekipo. E nivel mes di A2 mi tin cu bisa ta basta halto den mi opinion y sigur ta un nivel international cu mester echt entrena bon y duro pa por sigura bo lugar riba veld.

Mi prestacion tabata mas cu bon den e dos prome weganan. Mi ta tercera base fiho di e ekipo y mi a bate number 2, den cual cu mi tin un perfect score cu 4 hit den 6 turno di bate. Nan a nami un base por bola intencional y e otro tabata un base por bola normal. Mi ta sintimi super bon den e team, e coachnan ta tremendo y hopi profesional.

E hungadornan mes ta hopi disciplina, e ekipo en general ta super leuk y ta hopi welcoming na hungadornan di afo pa por juda e ekipo.

Trempan: Kiko ta e diferencia entre e softball na Aruba y esun di Italia?

SG: Mi por bisa cu e diferencia den Softball di Aruba cu di Italia ta un poco diferente sigur cu si. Pero e basis semper ta keda mescos. E frieuw ta hunga un rol vooral pami, pero mi ta constumando cu esey.

E parti di trainingnan no ta un wega at all.

Ta un disciplina fuerte cu tin akinan, vooral den jega na ora, e ekipo mes ta core y warm up prome cu e coach nan cuminsa cu e training. Esaki ta algo cu e coachnan ta enfoka hopi riba dje.

Cada hungador mester pasa un sport test intensivo na dokter. Cual ta check curason, condicion y pulmon y tur cos cu mester wordo aproba pa nos por hunga. Esaki mi a pase tambe sin problema.

Aki nos ta haya de todo, pañanan special pa train den nan, uniform pa biaha cune, uniform pa warm up prome cu wega como asta nos propio handbag y rugtas di team pa biaha cune. Mi tin cu bisa cu e sponsor pa cu softball kinan na Nuoro ta hopi grandi y ta zorg pa nos por tin tur cos profesionalmente.

Mi ta wordo paga pa hunga, cu biahenan paga pa hunga afo, nos ta hanja cuminda kinan di nan asta ora di biaha afo hunga tur cos ta covered. Letterlijk tur tur cos completamente paga door di e federacion y e sponsor mas grandi cual ta banco di Sardegna.

Trempan: Ki conseho Sayenne lo tin pa d otro softbolistanan cu kizas e esun deseo.

SG: Mi conseho no lo bay mas tanto pa e dirigentenan di softball paso mi no por compara Aruba cu Italia vice versa. Kinan e sponsors nan ta duna tur cos pa sport y esey ta hopi bisto.

Mi conseho ta bay mas tanto pa hungadornan. Si bo ta pasiona den softball: Train duro, pero train duro tur dia cu bo haya e chens. Siña bo mes pa tin un mindset disciplina, paso esey lo hibabo hopi leu mes. Ami mes nunca a pensa mi lo haya un chens asina ki den mi bida.

Pero bo mindset ta tur cos. Actualmente mi tin cu bisa Italia ta buscando pitchernan afo cual Italia falta di dje. Cualkier pitcher na Aruba cu ta sinti cu nan ta cla pa por hunga un dia afo, sigi train, duna di bo banda, y ta hopi disciplina cu bo mes y kere den bo mes.Tin hopi wowo y interes den nos hungadornan di Caribe sin cu nos mes sa. Ami sa sigur cu tin masha hopi hungador di Aruba cu lo por bin tuma e chens ki mescos cu ami a hasie, y mi ta sigur cu lo duna un tremendo presentacion aki na Italia.

Mi mes lo sigi train duro aki bou, hunga e mas mihor cu mi por pa por keda haya e oportunidad aki cual ta algo sumamente bunita mes. E ta un sentimento masha dushi mes pa hunga akinan y di loke mi ta siñando kinan pa por bay bek y sigi juda Aruba den softball.

 

Te asina leu nos entrevista cu Sayenne Geerman cu ta Nuoro, Sardegna, Italia. Sayenne su consehonan ta hopi valioso pa cualkier otro softbolista cu ta soña cu e posibilidadnan aki den bida.

Hopi exito Sayenne, sigui presta y laga e bandera di nos dushi isla di Aruba sigui briya na Italia.