E storia tras di Brainer, Disjonrick y  ‘Beyond Sports Limit Foundation’ 

Brainer cu Disjonrick a conoce otro 10 aña pasa durante un mainta na un careda unda Brainer a wordo aserca pa core cu un mucha homber cu e nunca a conoce. Desde e dia eynan te awe nan a crea un coneccion cu te dia di awe ta mas cu famia. Durante e ultimo 10 aña nan nan a core tur diferente distancia na Aruba te cu Marathon nan afo. Na banda di coremento Brainer y Disjonrick a hasi diferente triathlon na hunto y ultimo un Ironman na November cu intenshon pa colecta mas fondo pa e fundacion y yuda Disjonrick cu su tratamento nan y tambe otro mucha. 

 

Soño di Disjonrick semper tawata pa motiva otro persona nan y fungi como un motivational speaker y touch otro persona nan cu limitacion pa asina kibra barera y enfrenta cualkier miedo of duda den e mundo di deporte y otro cos. Pa por logra esaki e fundacion ‘Beyond Sports Limit Foundation’ a wordo lanta y desde e dia ey e fundacion ta logra yuda diferente persona nan cu limitacion pa logra nan meta nan den e mundo di deporte. Cu ayudo di Brainer Lampe y Gerald Moreta, Disjonrick ta logra yuda otro persona nan y sirbi como un ehempel y motiva otro pa sali eyfo y enfrenta e mundo.

 

Un di e soño nan di Disjonrick desde november tawata pa cumpli un Ronde van Aruba hunto. Ja cu esaki no ta un tarea fasil, nan a aserca Gerald Moreta cu ja tin paar di tempo ta train y yuda den tur manera cu por, y man habri Gerald Moreta a tuma e tarea aki. Disjonrick kier logra mustra kiko tur ta posibel si bo uni como un team y tur hende duna un man y logra un meta. Cumpliendo e Ronde van Aruba Disjonrick ta spera di haya mas hende pa aserca e fundacion y laga e fundashon duna un man y yuda den cualkier manera cu por. Sea ta core, bai lama, core bais, kayak, landa, no tin niun limite ora ta jega na e fundacion pa yuda den deporte. E fundacion semper ta para man habri pa yuda y por contact e fundacion via e media nan social of aserca un di e persona nan den e fundacion.

 

E fundacion ta desea tur participante di Ronde van Aruba hopi exito. Tambe ta invita tur hende pa bin experencia e anochi historica aki, unda barera nan lo wordo kibra. 

 

Un palabra di danki ta bai na full e team y famia. Tambe na tur e sponsors na cu a hasi esaki posibel.