“E aña 2023 ta miho aña deportivo desde Comite Olimpico Arubano su existencia. Un aña cu nos mester ta orguyoso di dje, nos tur a traha duro pa logra e metanan poni” esaki Presidente di COA, sra. Wanda Broeksema a bisa den su speech cortico dirigi na e famia Olimpico durante nan celebracion di pasco.
Diadomingo merdia durante di un ambiente familiar y festivo, unda miembronan di e famia Olimpico a clausura e aña deportivo 2023 cu un dushi brunch na Aruba Marriott Hotel & Stellaris Casino. E directiva hunto cu su staff di empleadonan como tambe e colaboradornan, a bini hunto pa asina reviva e momentonan bunita di e aña deportivo 2023, un aña super exitoso cu a culmina cu e participacion exitoso na e Weganan CAC na San Salvador, El Salvador como tambe na e recien Weganan Panamericano na Santiago, Chile. Comite Olimpico Arubano kier a gradici tur cu di un of otro manera a traha duro pa e exitoso aña 2023.
Na e federacionnan miembro, e voluntarionan, atletanan, entrenadornan, staff tecnico, personal, integrantenan di e comisionnan, medionan di prensa y en particular e prensa deportivo, miembronan di directiva, staff, personal, colaboradornan y cada un di esnan cu ta forma parti di e Famia Olimpico Arubano, e mihor deseonan pa e dianan di Pasco y un bon cambio di aña.
