Tanto diasabra como diadomingo tabata tin e di dos edicion di e Coaching Clinic 2023 di USA Baseball cu e profesionalnan di Merca, Andrew Bartman, Drew Briese y Steve Butler. E tayernan a ser organisa na Universidad di Aruba mientras e parti praktico tabata riba e tereno di baseball na Pos Chikito. Manera nos a indica esaki tabata e di dos edicion di e clinic aki. Nos a combersa cu dirigente di Aruba North Little League, sr. Melvin Quilotte riba e importancia di e clinic di baseball duna pa e expertonan di Merca.
297sports: Dicon e clinic di baseball aki tabata importante pa nos pelotero, coach y dirigentenan.
Melvin Quilotte: E importancia di e clinica sigur tin cuater punto di importancia:
– Repasa locual ya ta na bo conocimento
– Adapta cierto puntonan cu awendia ta wordo mira di un otro angulo
– Amplia bo conocimento cu materianan/drillnan nobo
– Aplica tecnicanan nobo den un training pa un mihor resultado den wega
297sports: Cua ta e parti cu mas a resalta den e clinic aki y dicon e ta asina importante
Melvin Quilotte: Pa mi loke mas ta resalta ta e parti Organisatorio, Structura y Profesionalisa di un instancia manera e Federacion di USA Baseball cu mester ta comparativo na nivel local cu un Amateur Baseball Bond Aruba. Mi a hiba combersacion separa cu e tres coachnan aki cu tin experiencia mundial den diferente categoria y claramente ta resalta e yearly planning cu nan tin pa cu e programa di baseball. Un di nan metanan principal ta duna oportunidad na peloteronan di por representa nan pais atraves di baseball riba e plataforma internacional.
Tambe nan ta con cu un Athlete Development Program (ADP) cu ta trata e maneho di abilidadnan avansa di un pelotero atraves di entrenamiento specialisa y evaluacion continuo.
297sports: Kiko Melvin a siña nobo?
Melvin Quilotte: Siña ta un proceso continuo, tur curso of clinica den e caso aki ta nutri bo conocimento. Importante ta siña conoce bo peloteronan mihor, tur tin nan estilo y mentalidad, ta trata di saca lo mihor di nan di loke nan tin pa ofrece. E no ta “one size fits all”!!!
297sports: Despues di a atende e clinic cual ta bo sugerencianan (nobo) pa esnan cu ta traha den e baseballa di Aruba.
Melvin Quilotte: Esnan cu kier traha den e mundo di baseball mester tin un mente habri, no pretende di sa of ta mihor cu otro. Nos tur tin algo di siña di otro. Laga nos pone metanan comun pa asina Aruba mescos cu Korsow por traha y logra den e mundo di baseball. Nos tin suficiente talento pa logra esaki. Nos tin cu organisa, structura y ta transparente den nos trabao, asina nos ta gana e confianza serca nos stakeholdernan pa inverti den e desaroyo. Ban subi ranking bek pero e mester ta un esfuerso conhunto. Lets built not break!!!
297sports: Conclusion
Melvin Quilotte: Pa mi nos por logra hopi mas cu loke ya nos a logra. Pero tin hopi trabao nos dilanti y mester duna e espacio pa un grupo traha y mester di financiamento…
