Copa Noord 2025 a celebra un bunita y colorido apertura diabierna ultimo na veld di Kudawecha. Durante e ceremonia a reconose y duna homenahe na 4 baluarte na kendenan Copa Noord 2025 ta wordo dedica. Johannes “Poy” Flanegin, Alvaro Barrios, Nel Frank y Francis
Arcaya.
Despues di a tira Lot Calabas Blue Jays e campeon di Copa Noord 2019 cual porcierto
tabata e ultimo Copa Noord cu a wordo organisa a enfrenta Bad Boys. Calabas Blue Jays no a
perde pa gana y a sali brabo riba Bad Boys derotando Bad Boys atrabes di blackout 21-0
demostrando cu nan ta e ekipo pa tene cuenta cune bek den 2025. Calabas Blue Jays 21 careda, 20 hit, 1 error. Bad Boys 0 careda, 2 hit, 7 error.
Rodney Kelly ta resulta pitcher ganador mientras Albert “Chomon” Boekhoudt ta bay cas cu e derota. Mihor bateadornan pa Calabas Blue Jays ta Jerrold “Beep Beep” Martijn di 5-3, Marvin Brown, Alfred v/d Linden y Vince Ramada tur a bay di 4-3. Pa Bad Boys a destaca na plato Eusebio Kelly y Jean Marc Koolman kendenan a bay di 2-1.
Copa Noord 2025 lo continua diasabra awor cu 3 partido amistoso 5pm,7pm y 9pm mientras diadomingo 25 di mei un tabla lo bula. Cuminsando pa 11 am Bad Boys lo enfrenta Stingers, sigui pa 12.45pm Kudawecha Redskins vs Super Plus, 2.30pm Calabas Blue Jays lo topa Royal Power y pa 4.15pm Kudawecha Indians lo topa Salbabo. Pues siman entrante Copa Noord lo bay ta hot y veld di Kudawecha ta unda bo mester ta. Copa Noord 2025 a la carga!
