436
E islanan di Aruba, Boneiro y Corsow por ta satisfecho y sigur orguyoso di e Weganan Escolar Interinsular cu despues di 7 anja di ausencia ta bolbe haci su entrada na e tres islanan menciona.
Diasabra anochi na e ceremonia di clausura den e ballroom di Hyatt Place, e tres mandatarionan di deporte di Aruba, Boneiro y Corsow a elogia e corahe y iniciativa cu a tuma pa reanuda e hermandad deportivo escolar entre nos muchanan di scol. Nos mester por traha hunto pa logra cosnan grandi riba tur area y deporte sigur ta uno di nan. Na banda cu a intercambia diferente bunita obsekio di carinjo, a haci entrega di e bunita trofeonan na e respectivo ganadornan y nombra e MVP den e dos deportenan cu a tuma lugar.
Tabata simplemente un super fin di siman den deporte escolar na Aruba unda nos alumnonan di Aruba, Boneiro y Corsow a bataya deportivamente pero mas cu tur cos a haci amistad cu otro y asina fortifica e union mas aun entre e tres islanan.
Deporte Escolar Interinsular a wordo teni na tur e tres islanan y aki sigur mester duna palabra di elogio na IBISA Aruba, Fundashon Deporte Di Korsou y Indebon pa e tremendo trabou desplega den organisa un bon weganan escolar interinsular.
Pabien na tur cu e haci esaki un realidad pa nos alumnonan di scol dio Aruba, Boneiro y Corsow.
