1.2K
Mañan diasabra pa 4or di atardi lo inicia e prome careda internacional di BMX riba e pista di bike cross na Parke Curason Jaburibari. Un careda di taya unda coredornan internacional lo busca nan puntonan necesario pa loke ta e clasificacion Olimpico Paris 2024, entrenan nos Shanayah Howell. Awe diabierna nos di 297sports tabata enbibo na Jaburibari unda representante Monique Leerdam di Aruba Wielerbond, Gustavo Matus di COPAB y Chris Bullivant UCI a anuncia cu varios coredor rond mundo a bini Aruba pa busca e puntonan di clasificacion Olimpico. Esaki ta prome biaha den historia cu caredanan di taya lo tuma lugar na Aruba
Na banda di esey lo tin mas cu claro nos propio hoben coredornan cu lo bataya contra esnan di exterior. Mayoria biaha nos por aprecia e bunita resultadonan nos hoben coredornan ora nan bay competi den exterior pero tiki biaha nos mes por a presencia esakinan core na Aruba mes.
Wel e momento a yega pa Aruba completo bini Parke Curason Jaburibari tanto diasabra como diadomingo y bin apoya seleccion di Aruba como tambe e otro paisnan riba un pista di Parke Curason awor ilumina cu luznan nobo nobo. Tin tribuna pa sinta y mas cu claro un bar y cushina bon surti
E caredanan lo ta diasabra 4or di atardi te cu anochi ora e caba. Y pa su diadomingo e caredanan lo inicia pa 8or di mainta te parti merdia rond di 1or pa asina por entrega premio.
Yega y bin apoya e deporte di BMX, Aruba y nos bishitantenan.
