1K
Por medio di e relato aki nos di SV Racing Club Aruba (RCA) kier a informa lo siguiente.
Ayera durante reunion anual di nos miembronan, bestuur actual a duna relato pa loke tabata aña 2022. Un bestuur encabesa pa Sr. Jeff Lopez, hunto cu 6 miembro mas, tur edad jong a pasa man cu e timon y a traha duro pa e club y su miembronan. E no tabata fasil, e tabata tin su reto nan, pero nos ta convenci cu e stap nan debido y corecto ta wordo tuma.
A elabora riba begorting pa 2023-2024, caminda e focus ta principalmente pa dreche e club y e muraya. E 2 aspecto nan aki ta aporta na extra seguridad pa nos miembronan. Tambe a presenta plan nan pa celebra e 90 aña di existencia di nos club. E cambio mas grandi cu e bestuur actual ta cabando cune ta un modernisacion di e statuut y huis reglement di RCA despues di 70 aña.
Un otro punto cu a bin riba mesa, tabata eleccion di bestuur pa loke ta 2023 – 2026. Segun e statuut nobo, esaki ta bira 3 aña en ves di 1 manera e ta stipula den e statuut biew. Esnan presente a vota y nos por anuncia cu e bestuur actual a wordo re-elegi pa maneha RCA pa e siguiente 3 aña nan. Ta trata aki di Presidente Jeffrey Lopez, Jean Marc Ras, Anique Corsen, Tiana Leon, Betza Rasmijn, Dennerich Kelly y Arianne Westerburger.
Mirando tur e logronan positivo den 2022, cu a sigi den 2023, nos di RCA ta sigur cu esaki lo continua pa loke ta temporada 2023 – 2024. Pa menciona algun den 2022: RCA Hoofdklas Campeon Copa Betico, U9 Oro y Plata Campeon, U11 Oro y Plata Campeon, U17 Campeon, Damas Youth Campeon, Damas Open Campeon y Hoofdklas Sub Campeon. Apart di esaki, RCA a introduci si techinschbeleid cual ta bow encargo di Veron Albertsz.
Pa finalisa, nos di RCA por segura cu nos ta bin por la goma pa loke ta campeonato 2023-2024. Preparacion nan a cuminsa, training tambe a cuminsa pa loke ta tur divicion. Hunto cu nos mayornan, leidster, coach, miembro y sin lubida nos sponsornan, nos ta sigur cu RCA tei pa Bida!