905
E mihor wega di henter e torneo di Aruba Beach Tennis Open 2023 te cu awor. Un wega cu dificil por a keda sinta riba bo stoel mirando e emocion y suspenso. E publico e keda apoya for di e prome minuut te ora e wega caba sin stop.
Diamars anochi e publico grandi presente na e Center Court a mira un señor di partido den single entre dos top mundial di e deporte aki cu ta nos propio Aksel Samardzic di Aruba contra di Andre Baran di Brazil. Aksel cu di diamars mainta 9or a cuminsa hunga single y mixed double a gana tur su weganan y yega te semi-final den single.
Aksel a inicia e wega di semi-final contra di Baran no den gran forma y rapidamente ta cay atras 4 – 1 contra e brasilero cu ta number 3 ranked den e torneo aki. Pero e miho atleta di beach tennis di Aruba apoya pa su publico ta bini bek bon unda e ta corta ventaha y bini bek na 6 – 4 pa despues iguala na 7 – 7. E wega simplemente tabata den un suspenso constantemente ya cubo no sa unda e punto ta bay. Ambos hungador tabata agota y cansa pero ta purba mantene nan servicio. Baran su servicio tabata bon e anochi aki y a duna hopi dolor di cabes. Aksel encambio a hunga varios wega riba un solo dia y a cay den un draw dificil pero asina mes e la sa na bringa su mes y gana tur su weganan. Aksel su surf tambe tabata skerpi y algun di su return nan tabata di nivel mundial manera nos ta custuma di dje. Na 8 – 8 mester a bini un tie-break y aki ora cu Baran tabata gana 6 – 2 tur hende a kere cu e lo gana su ultimo punto pero Aksel a demostra determinacion y ta bini bek empata na 6 – 6 y hasta bay ariba pa e 7 – 6. Aki e hungador di Aruba ta perde su dos punto crucial cual despues Baran ta bin anota e match point pa hiba e victoria y e clasificacion pa final.
Awe diaranson, Aksel lo sigui den e mixed doubles cu su partner di Venezuela y lo hunga 11.40 di mainta.
