798
Den e stadion di Rincon na Boneiro, e ekipo di cas ta enfrenta Aruba den e clasificacion di Concacaf W Gold Cup. Mester bisa cu Aruba ta perde e oportunidad pa obtene 3 punto hopi importante pa tene nan mes den e bon direccion di clasificacion. Aruba a haya extra refuerzo e biaha aki cu keeper Hadassa Kock y delantero Tari Doornkamp. Aruba a domina gran parti di e wega pero dos infraccion den e area penal ta causa cu dos penalti ta keda bon ehecuta pa Boneiro. Un gol den extra tempo ta pone e isla flamingo seya nan prome victoria den historia di e seleccion fememino mayor. Remarcabel ta cu Boneiro a hunga e di dos tempo cu 10 hungador ya cu den e prome tempo nan ta perde un defensor cu a ricibi carchi cora.
ARUBA DOMINANTE
Pa loke ta e wega mester bisa cu den e prome tempo nos por a mira un wega basta pareu cu ambos ekipo buscando e atake. Segun e wega ta avansa, Aruba ta bira mas peligroso y esaki a conduci na e prome gol ora un cruse di Sussana den e area di Boneiro ta cay den pia di un defensor cu no por a rechasa esaki. Na e momento ey delantero Lammers tabata di skop e bala for di corto distancia riba shoot pero e delantero di Aruba ta wordo deriba unda referee ta pita penalti. Aki Vanessa Sussana ta anota e 1 – 0 pa Aruba den un penalti bon cobra. Despues di e gol, tanto Aruba y Boneiro ta ataka e gol di otro cu Aruba cu e mihor chens unda bes mas, e delantero Lammers ta hera un bala morto dilanti gol riba un cruse di Sussana. Notable ta cu delantero Lammers no tabata den su mihor anochi ya cu no tabata skerpi manera e weganan anterior y a faya varios bala cu etiketa di gol.
GOLNAN BONEIRO
Den tur e esfuerso di Aruba pa amplia e marcador Boneiro ta bolter e wega den algun minuut na nan fabor. Cu dos penalti den un diferencia di seis minuut, Boneiro ta anota dos gol pa e 2 – 1. E prome tabata na di 34 minuut, ora cu keeper Kock ta comete un infraccion riba un hungador di Boneiro, aki e hungador Bibi Wijnschenk ta anota e prome gol den historia di e futbol femenino mayor di e isla flamingo pa e 1 – 1. Un rato despues Boneiro ta bolbe haya un penalti y aki un bes mas Bibi Wijnschenk ta bolbe anota pa e 2 – 1. E biaha aki e infraccion a bini di e defensa Gumbs.
CARCHI CORA
Casi yegando na final di e prome tempo un defensor di Boneiro ta haya un carchi cora direct despues di un infraccion duro y un actitud anti-deportivo unda e ta laga su ekipo cu 10 hungador.
VICTORIA BONEIRO SIGURA
Den e di dos tempo Aruba a haci algun cambio y a pone presion riba Boneiro atakando formal. Na di 65 minuut, Lammers ta kita e bala di e ultimo defensor di Boneiro y ta haya su so cu keeper pero e ta desperdicia e oportunidad cu un mal tiro riba gol. Aruba ta sigui presiona pero nos seleccion simplemente no tabata tin e creatividad pa anota e gol di empate contra un Boneiro cu a defende su ventaha hungando cu hopi hende den defensa y loer riba un counter. Un cambio di oro ta pone Boneiro seya e victoria den extra tempo ora cu e subsituto Rier ta anota for di leu pa e 3 – 1.
STANDING
Cu e derota aki, Aruba a cay na di tres lugar cu 3 punto mientras cu Boneiro ta pasa Aruba y bay pa di dos lugar cu 4 punto. Belize ta comanda e tabla cu 9 punto y Turks and Caicos tin 1 punto.
Aruba lo bolbe hunga contra Boneiro dialuna awor 30 di oktober den e clasificacion di Concacaf W Road Gold Cup. E wega lo ta pa 4or den stadion Guillermo Trinidad na Dakota