Aruba Soccer Academy pa prome biaha den su 8 aña di historia ta biahando pa un torneo internacional, e Medellin Soccer Cup

E torneo aki ta un di esunan mas grandi y reconosi na Latino America, y tin paisnan manera Mexico, Santo Domingo, Panama, Ecuador y Colombia ta participa.

ASA ta participando cu U8, 2 grupo di U9, U10 y U11. Ya ASA tin 4 luna ta prepara intensivamente pa e torneo aki, cu sigur ta un experiencia absolutamente priceless pa e muchanan desaroyo como futbolista. Na banda di esey nan lo enrikese nan desaroyo personal cu conose otro cultura y sera amistadnan nobo.

Ayera diabierna algun hungador a sali pa Medellin caba, diadomingo tin algun ta bai y awe diasabra tin un grupo di 94 hende pa sera e team di ASA cu lo ta hibando e nomber di Aruba den nan curason.

Hopi exito na Aruba Soccer Academy na Medellin, Colombia