1.6K
E seleccion di Aruba femenino major ta perde nan prome wega den e clasificacion Road to Women’s Gold Cup. Den nan prome di e dos weganan disputa, Aruba ta cay venci 2 – 0 contra Belize na Belmopan, Belize. Aruba ta haya gol encontra den un corner cu un bunita cabezaso na di 65 minuut y den un gol coloca na di 90 minuut.
Pa loke ta e wega riba su mes, mester bisa cu den e prome tempo, Aruba tabata un tiki mas mihor cu Belize, e delanteronan militando den exterior, Lammers y Susana na algun ocasion tabata peligroso padilanti pero no por a haya e bon punteria pa anota gol. E bon combinacion entre e dos hungador nan aki a haci falta, hopi atake tabata individual. Di otro banda Belize tambe tabata peligroso pero e linea di defensa di Aruba tabata bon posiciona lidera pa e capitan Gumbs. E wega tabata 51 porciento domina pa Aruba pa loke ta e posicion di bala den e prome tempo.
Den e di dos tempo, DT Veron ta buska mas e atake cu Henao y Dreischor pa asina sorpresa Belize principalmente usando e liherez di Susana y Lammers padilanti. Aruba a comanda bon pero no ta logra penetra den e area di diezseis di Belize. Ora di atake, Lammers su so ta purba pero Susana tabata ta keda demasiado na linea y asina no a crea mucho peliger pa e linea di defensa ni e gol defendi pa Belize. Ta bon pa bisa aserca cu portero Henriquez a luci(nos conoce como defensor) bou di e latanan pa Aruba. E gol ta cay na di 65 minuut riba un cabezaso den un corner. Despues di e gol ta opta pa bay busca e empate unda Gumbs ta sali for di defensa y hunga den bolante. Pero den pito y den un contra atake Belize ta sigura e wega unda e capitan ta anota pa e 2 – 0 pa nan prome victoria. Na 2022, Aruba a topa Belize caba esaki pa e clasificacion pa mundial unda ta empata 1 – 1.
Notabel cu den Aruba tabata tin varios hungadornan hoben cu a keda selecciona pa DT Veron Albertsz y a haci un bon papel mes. Dos aña pasa ainda nan a hunga CFU U14 na Republica Dominicana y awe ya nan a haci nan debut den seleccion major. Mas cu claro den Aruba nos a haya falta di hungadornan clave manera un Michaela Netto, Wendy Angela, Tari Doornkamp, Loredana Neppi y Bindiya Wadhani(e ultimo dos nan no tin paspoort Hulandes).
Dia 25 di september, Aruba lo bolbe mira accion e biaha aki na Turks and Caicos pa nan di dos partido mientras Boneiro lo ta di bishita na Aruba algun siman despues. E wega entre Boneiro y Turks and Caicos a termina 0 – 0.