1.4K
Otro siman e futbolista femenino estelar di Britannia y seleccion di Aruba lo emigra pa Hulanda unda e lo bay sigui su scol y forma parti di e ekipo profesional di Jong Utrecht. Diahuebs atardi, na nan clubhuis e organisacion di Piedra Plat esta Sv Britannia y Britannia Damas a tuma despedida di nan hungador. Diferente persona a hiba palabra na e ocasion aki manera coach, mayor y dirigente mientras tabata ta tin intercambio di recuerdo pa asina keda corda riba tur e bunita momentonan hunto. Tur a elogia e esfuerso di Michaela como futbolista y como persona.
Michaela Netto a hunga den diferente categoria di mucha homber y mucha muher cu Britannia unda e la logra varios titula campeon di Aruba y bira e hungador mas valioso di e campeonato.
Conoci pa ta un defensa skerpi y fuerte den su hugadanan, Michaela a sa na gana e respet serca su contrincantenan femenino y masculino. Cu Michaela a logra un contract cu un organisacion profesional manera FC Utrecht tabata un cuestion di tempo y nos sigur tabata sa cu e dia ey lo bay yega. Den seleccion nacional di futbol femenino, Michaela tabata un pieza clave y nos tur por corda cu na 2022 apesar di tabata lesiona asina mes e la carga e ekipo di Aruba Girls U15 te na un di dos lugar den e torneo di CONCACAF na Tampa, Florida.
Mika nos di 297sports ta deseabo tur clase di exito den bo estudio y den e ekipo di Jong Utrecht na Hulanda.
