889
Awe dialuna, seleccion di Aruba a enfrenta e pais fuerte den nan grupo cual ta Belize cu tabata invicto sin perde un wega. Den Aruba su prome encuentro na Belize nos seleccion a cay venci cu e score di 2 – 0, pues awe nos tabata tin algo pa demostra. Seleccion di Aruba tabata casi intacto faltando dos pieza clave den keeper Haddesah Kock y bolante defensivo Assia Gumbs.
Aruba a sali cu practicamente e mesun 11 nan den e wega contra di Turks & Caicos. Den e prome tempo, Aruba a hunga bon defensivamente cu un Belize hopi den atake y a domina den e medio campo por completo. Aruba no a logra forma nan atakenan saliendo for di e medio campo unda nos a perde hopi bala debi na e presion cu Belize tabata pone pa recupera esaki. E futbol di fisica cu Belize a hunga cune tambe tabata notable, nan a gana hopi duelo uno contra uno. Padilanti
Lammers, Susanna y Doornkamp no a haya mucho bala mirando cu nan tabata fuertemente marka. Cada bez nan mishi cu e bala nan a haya nan mes confronta cu dos a tres defensa riba nan. Mester bisa cu Belize ta na un nivel un tiki mas superior cu Aruba, pero nos ta hopi serca. Nos linea di defensa comanda pa Hazel, Saladin Maduro y Mora ayuda pa Angela tabata stabil sin lubida portero Henriquez. Apesar di e presion enorme nos seleccion a sa na wanta duro.
Den e di dos tempo, Aruba a sali brabo unda nos a realisa nos prome bon atake pero Doornkamp a tarda pa scop e bala riba gol. Mester bisa cu Aruba tabata hopi pareu cu Belize den e di dos tempo unda nos a yega mucho mas dilanti nan gol y a crea varios peliger pa nan linea di defensa. E cambio di Amy den medio campo y Layeska como alero a pone cu nos a avansa mucho mas padilanti. Nos linea di defensa a keda stabil y no a duna mucho oportunidad pa sorpresa. Asina mes na di 83 minuut un freekick dudoso di parti di e referee(no por bise otro) ta duna Belize e ventaha di 1 – 0 cu un tiro net tras di e are penal. Na di 89 minuut, Aruba tambe ta haya un freekick hopi serca pero e tiro ta dal den e barera.
All by all nos por ta satisfecho cu e seleccion y awor tin cu sigui traha pa e compromisonan den 2024.
