Recientemente alumnonan di ciclo basico 2 di Maria College Mavo mester a pensa y ehecuta un tarea pa e materia CKV cu e carga e tema “Passport to success”. E alumnonan mester a scohe un deportista local pa celebra su exito pa e materia di Culturele en Kunstzinnige Vorming, CkV. E celebracion aki nan mester a trahe den un forma teatral y cu baile. E persona cu nan a escohe mester ta nan inspiracion pa yega na e presentacion final. E alumnonan a scohe Xander Bogaerts y Chadwick Tromp di e deporte di baseball y di aki e inspiracion a bin unda nan mester a haci movecionan di e deporte di baseball. Di otro banda un klas a scohe Denzil Dumfries unda e movecionan ta bin inspira pa futbol. Notabel ta cu e alumnonan tabata hopi creativo den nan presentacion unda e entusiasmo tabata gradisimo y mirando cu e mayoria gusta deporte esaki a dune un toke extra.
Sigur un bunita proyecto unda nos alumnonan di scol ta mira nos atletanan como un fuente di inspiracion y rolemodel pa no solamente nos hobennan pero pa henter nos comunidad. Den mayoria pais na mundo atleta y deporte ta fuente di inspiracion y motivacion pa un pueblo. E positivismo cu ta reina tras di esaki ta inmenso y impactante.
Maria College Mavo pa varios anja caba tin e proyecto aki como materia final di CKV pa nan alumnonan. Un pabien grandi na e alumnonan di CB2 cu nan proyecto.
Potret: John Freddy Montoya
