Jenniffer Baez A Briya na Taekwondo Canada Open 2024 y Gana Medaya Di Plata!

by Jessica Krozendijk
466 views

Aruba Taekwondo Bond (ARTBO) ta hopi contento di anuncia e prestacion excepcional di Jenniffer Baez na e prestigioso Taekwondo Canada Open 2024, cu a tuma lugar na Vancouver, Canada dia 8 di februari 2024.

Baez, representando Aruba cu orguyo, a logra un medaya di plata mas cu mereci den categoria di Poomsae Reconoci Individual Femenino bou di 40 aña. E exito aki ta mas impresionante ainda debi na e nivel halto di e competencia, cu tabata un evento di Ranking G2 cu participacion di atletanan di Brasil, Mexico, Puerto Rico, USA, Canada y Aruba.

Baez a demostra un talento y determinacion excepcional durante henter e campeonato, avanzando pa cuatro ronda pa yega te na final. Den un competencia contra competidornan fuerte, el a logra e siguiente puntonan:

Round Uno: Mexico vs. Aruba (7.366 punto | 7.616 punto)

Round Dos: Puerto Rico vs. Aruba (7.649 punto | 7.882 punto)

Round Tres: Aruba vs. Brazil (8.466 punto | 8.383 punto)

Round Cuatro: USA vs. Aruba (8.799 punto | 8.499 punto)

ARTBO ta extende su felicitacion di curason na Jenniffer Baez pa su exito remarcabel na e Taekwondo Canada Open 2024. Su dedicacion, talento y deportividad ta un berdadero inspiracion pa atletanan den desaroyo na Aruba y pa otro paisnan. Nos ta warda cu ansiedad pa su exito continuo den futuro!

 

 

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs