E bida aki ta mucho cortico pa nos keda rabia cu otro, sigur si nos mira e amistad y principalmente e respet cu semper a reina entre nos tur como futbolistanan ehemplar.
E dos baluartenan di nos futbol local, Jonathan Lake, entrenador di Dakota y Ronald Gomez, futbolista di RCA a aserca nos pa via 297sports pa manda un mensahe na henter nos comunidad pa e sucedido despues di e wega final di dos siman atras den e gran final di nos futbol local.
Durante e combersacion entre nos a resulta cu e emocion por traiciona bo y domina bo pa un rato.
Sin duda esaki por pasa tur hende, sigur ora bo adrenalina ta halto cual por trece un tension cune. Esaki por trece un reaccion fastioso cune locual a pasa tambe.
Pero ora cu bo tin e madurez suficiente pa realisa cu un cos a bai robes, e no ta kita nada dibo pa yega topa otro personal un rato y demostra grandesa, balor y respet cu semper tabata tin entre si. No ta costabo nada di pidi otro dispensa pa locual a pasa, paso esey ta e forma con e legado lo keda den mente y curason di hopi eyfor cu ta mira ambos como gran ehempelnan di nos futbol y deporte local!
Manera Ronald Gomez a bisa cu Jonathan semper lo ta un idolo pe, un rolemodel cu a la hunga cune desde e la cuminsa hunga hoofdklas den RCA. Es mas, Jonathan a entrena Ronald den e Lifida di RCA. Cu otro palabra ta hopi respet mes Ronald tin pa Jonathan cu a significa masha hopi mes pa su persona ora e la inicia cu su carera den e mundo di futbol. Y hasta despues cu ambos a sigui cu nan caminda, e respet mutuo y intercambio riba e tereno di futbol a continua pa yuda esnan mas hoben cu ta sigui den nan pasonan. Y mas cu claro pa Jonathan esaki no ta diferente. E anja di Gloria di e organisacion tricolor na 2002, cu Ronald como un hoben den delanteria di RCA, bandi Jonathan lo keda den memoria di hopi como un di e duonan mas peligroso cu a existi den e era moderno di nos futbol local. Hunto nan a percura pa un total di 85 gol anota durante henter e Campeonato inclui e playoff final, copa y weganan internacional, pues un machine di gol. Pesey mes, Jonathan tin masha aprecio mes pa Ronald.
Cu esaki e Mensahe N’e Hubentud eyfor ta cla y raspa; ‘No cai den e trampa di emocion y laga e ego propio domina bo y no regla bo errornan cometi”.
Esaki ta simplemente palabranan di e Idolonan di nos Futbol.
Jonathan Lake y Ronald Gomez